BAKI, AzerVoice

Qırğızıstan Prezidenti Sadır Japarov 31 iyul 2025-ci il tarixində Özbəkistanın xarici işlər naziri Bəxtiyor Səidovu Çolpon-Ata şəhərində qəbul edib.

AzerVoice xəbər verir ki, görüşdə iki ölkə arasında strateji tərəfdaşlıq çərçivəsində əməkdaşlığın mövcud vəziyyəti və gələcək imkanları müzakirə olunub.

Tərəflər enerji, nəqliyyat və iqtisadi inteqrasiya sahələrində birgə layihələrin həyata keçirilməsinin vacibliyini vurğulayıblar.

Görüşdə Kambaratı Su Elektrik Stansiyasının (SES-1) inşası və Qırğızıstan–Çin–Özbəkistan dəmir yolu layihəsi əsas diqqət mərkəzində olub. Japarov bu layihələrin yalnız Qırğızıstan və Özbəkistan üçün deyil, bütövlükdə region üçün strateji əhəmiyyət daşıdığını qeyd edib.

Qırğızıstan lideri, iki xalq arasında mövcud olan tarixi bağlara, mədəni yaxınlığa və ortaq dəyərlərə istinad edərək bildirib ki, Özbəkistanın xarici işlər nazirinin səfəri ölkələr arasında yüksək səviyyəli siyasi dialoqun davamlılığını və qarşılıqlı etimadın güclənməsini göstərir.

Görüş zamanı nazir Bəxtiyor Səidov Sadır Japarova Özbəkistan Prezidenti Şavkat Mirziyoyevin salam və xoş arzularını çatdırıb. O, dövlət başçılarının müəyyən etdiyi məqsədlərin reallaşdırılması naminə Özbəkistan tərəfinin bütün səylərini davam etdirəcəyini vurğulayıb.