BAKI,VOA Orxan Qədirzadə

Ümumdünya Səhiyyə Təşkilatı Atlantik okeanında kruiz gəmisində baş verən hadisə ilə bağlı üç nəfərin ölümünü açıqlayıb və nadir rast gəlinən Hanta virusu ilə bağlı şübhələrin araşdırıldığını bildirib. Mütəxəssislər qeyd edir ki, nadir olsa da, bu virus bəzi hallarda ağır və ölümcül nəticələrə səbəb ola bilər.

Hanta virusu nədir və virus necə yayılır?

Hanta virusu (ortohantavirus) əsasən gəmiricilərdə – siçan və siçovullarda yaşayan viruslar ailəsidir və insanlara keçə bilir. Araşdırmalara görə, dünyada ən azı 38 növ bu virus mövcuddur və onlardan 24-ü insanlarda xəstəlik törədir.

Virusun əsas yayılma yolları bunlardır:

Gəmirici ifrazatları ilə çirklənmiş havanın tənəffüsü
Yoluxmuş heyvanların sidik, nəcis və ya tüpürcəyi ilə təmas
Nadir hallarda dişləmə və ya cızılma
Qedy edək ki, kənd təsərrüfatı ilə məşğul olan əhali daha yüksək risk altındadır. Virus adətən insandan insana asan ötürülmür.

Virusun əsas simptomları

Hanta virusunun simptomları virusun növündən asılı olaraq dəyişir. Ümumilikdə iki əsas forma mövcuddur:

Köhnə dünya növləri (Avropa və Asiya):
yüksək hərarət
baş ağrısı
bel və qarın ağrıları
böyrək zədələnməsi
Bu forma Hemorragik qızdırma böyrək sindromu ilə ilə xarakterizə olunur.

Yeni dünya növləri (Amerika qitəsi):
sürətlə ağırlaşan tənəffüs çatışmazlığ
ağciyər sindromu
qripə bənzər ilkin əlamətlər (yorğunluq, əzələ ağrısı)
Bu forma daha təhlükəlidir və ölüm riski yüksəkdir.

Gizli dövr və diaqnostika çətinliyi

Virusun inkubasiya dövrü 1 həftədən 8 həftəyə qədər davam edə bilər. Erkən mərhələdə simptomlar qripə bənzədiyi üçün diaqnostika çətinləşir.