İsrailin şimalında yerləşən Hayfa şəhəri və ətraf ərazilər raket hücumuna məruz qalıb. Hadisə nəticəsində altı nəfər xəsarət alıb, onlardan bəzilərinin psixoloji sarsıntı keçirdiyi bildirilir. Bir nəfərin isə partlayış dalğası nəticəsində yaranan dağıntıdan zərər gördüyü qeyd olunur.

İran Silahlı Qüvvələrinin Baş Qərargah sözçüsü briqada generalı Əbülfəzl Şikarçi ABŞ-ın mümkün quru hücumu ilə bağlı kəskin bəyanatlarla çıxış edib. Dövlət televiziyasında çıxış edən Şikarçi, ABŞ Prezidenti Donald Trampın hədələrini dəyərləndirərək, Tehranın hər cür ssenariyə hazır olduğunu bildirib. "Biz Amerikanın quru hücumunun başlamasını gözləyirik. Onlara elə bir dərs verəcəyik ki, dünyanın ən zəif ölkəsini belə işğal etməyi xəyallarına gətirə bilməyəcəklər," — deyə general vurğulayıb.

İran İslam İnqilabı Keşikçiləri Korpusu (SEPAH) Birləşmiş Ərəb Əmirliklərində (BƏƏ) amerikalı uçuş mühəndisləri və döyüş pilotlarının toplandığı "gizli nöqtənin" ballistik raketlərlə hədəf alındığını iddia edib. Korpusun yaydığı rəsmi bəyanatda bildirilir ki, BƏƏ-dəki bazalardan kənarda yerləşən və ABŞ hərbi personalı üçün gizli görüş yeri kimi istifadə edilən obyekt ballistik raketlərlə dəqiqliklə vurulub. Bu iddia regionda ABŞ-İsrail və İran arasındakı hərbi qarşıdurmanın yeni və daha təhlükəli mərhələyə keçdiyini göstərir.

ABŞ Prezidenti Donald Tramp İrana qarşı davam edən hərbi əməliyyatlarla bağlı qalmaqallı bəyanatla çıxış edib. Tramp sosial media hesabında paylaşdığı mesajda bildirib ki, dünyanın ən güclü ordusu olan ABŞ Silahlı Qüvvələri hələ "İranda geriyə qalanları məhv etməyə başlamayıb". Prezident hərbi kampaniyanın növbəti mərhələsində mülki və strateji infrastrukturun, xüsusilə də körpülərin və elektrik stansiyalarının hədəf alınacağını açıq şəkildə bəyan edib.

Filippin hökuməti öz gəmilərinin Hörmüz boğazından keçidinə icazə veriləcəyini rəsmən elan edib. Manila rəhbərliyinin bir müddətdir İran ilə apardığı intensiv diplomatik təmasların nəticəsi olan bu qərar, regiondakı dəniz nəqliyyatının canlanması baxımından kritik bir addım kimi qiymətləndirilir. Filippin tərəfi enerji təhlükəsizliyini təmin etmək və neft daşımalarını davam etdirmək məqsədilə İran tərəfindən "düşmən olmayan dövlət" statusunda tanınmağa nail olub.

Küveyt Dövlət Neft Şirkəti (KPC) Əl-Əhmədi limanındakı strateji neft emalı zavodunun pilotsuz uçuş aparatları (PUA) tərəfindən hədəf alındığını açıqlayıb. Küveytin rəsmi xəbər agentliyi KUNA-nın yaydığı məlumata görə, hücum sübh saatlarında baş verib və nəticədə zavodun bir neçə əməliyyat blokunda yanğınlar başlayıb. Şirkət rəsmiləri hadisədən dərhal sonra fövqəladə hallar və yanğınsöndürmə briqadalarının müdaxilə planlarını işə saldığını və yanğının digər sahələrə yayılmaması üçün intensiv iş apardıqlarını bildiriblər.

Birləşmiş Ərəb Əmirliklərinin (BƏƏ) Müdafiə Nazirliyi ölkənin hava hücumundan müdafiə sistemlərinin gün ərzində İrandan buraxılan 19 ballistik raket və 26 pilotsuz uçuş aparatına (PUA) uğurla müdaxilə etdiyini açıqlayıb. Nazirliyin sosial media hesabından verilən bəyanatda bildirilir ki, bütün hədəflər havada aşkar edilərək effektiv şəkildə zərərsizləşdirilib. Bu son əməliyyat regionda gərginliyin artdığı bir vaxtda ölkənin hava məkanının qorunması istiqamətində atılan qətiyyətli addımların davamıdır.

Birləşmiş Ərəb Əmirlikləri beynəlxalq hüququn kobud şəkildə pozulması olan İranın Küveyt Dövlətindəki hərbi düşərgəyə qarşı törətdiyi və silahlı qüvvələrin 10 üzvünün yaralanması ilə nəticələnən səbəbsiz terror hücumunu ən sərt şəkildə pisləyib. Xarici İşlər Nazirliyi (XİN) verdiyi bəyanatda bu təcavüzün Küveyt Dövlətinin suverenliyinin pozulması və təhlükəsizliyinə və sabitliyinə təhdid təşkil etdiyini və bundan əlavə, KƏŞ dövlətlərinin və daha geniş regionun təhlükəsizliyini təhdid edən təhlükəli bir eskalasiyanı təmsil etdiyini təsdiqlədi.

Birləşmiş Ərəb Əmirlikləri, Birləşmiş Krallıq, Fransa, Almaniya, İtaliya, Niderland, Yaponiya, Kanada, Koreya Respublikası, Yeni Zelandiya, Danimarka, Latviya, Sloveniya, Estoniya, Norveç, İsveç, Finlandiya, Çexiya, Rumıniya, Bəhreyn, Litva və Avstraliya liderlərinin Hörmüz boğazı ilə bağlı birgə bəyanatı. Biz İranın Körfəzdəki silahsız ticarət gəmilərinə son hücumlarını, neft və qaz qurğuları da daxil olmaqla mülki infrastruktura hücumları və İran qüvvələri tərəfindən Hörmüz boğazının de facto bağlanmasını ən sərt şəkildə pisləyirik.

"Washington Post" qəzetinin məlumatlı mənbələrə istinadən yaydığı xəbərə görə, ABŞ ordusu Prezident Donald Trampın tapşırığı ilə İranın nüvə obyektlərindəki yüksək dərəcədə zənginləşdirilmiş uranyumun ələ keçirilməsinə dair genişmiqyaslı əməliyyat planı hazırlayıb. Ötən həftə Ağ Evə təqdim olunan bu gizli plan, İranda mövcud olan təxminən 450 kiloqram yüksək dərəcəli uranyumun müsadirə edilməsini nəzərdə tutur. Planda radioaktiv materialların təhlükəsiz daşınması üçün bölgəyə ağır qazıntı avadanlıqlarının göndərilməsi və kargo təyyarələri üçün xüsusi uçuş-eniş zolaqlarının inşası öz əksini tapıb.

İraqın Xalq Səfərbərlik Qüvvələri son 24 saat ərzində ABŞ və İsrail tərəfindən iki dəfə zərbəyə məruz qaldığını açıqlayıb. Qurumun açıqlamasında qeyd olunub ki, hücumlar nəticəsində insan tələfatı qeydə alınmayıb. Ekspertlər vurğulayır ki, sözügedən qüvvələr İraq ordusunun tərkibində fəaliyyət göstərsə də, bəzi briqadalarının İranla əlaqəli olması regionda hərbi gərginliyin artmasına səbəb olur.

İranın Ali rəhbəri Müctəba Xameneinin baş müşaviri və ölkənin nüfuzlu siyasətçilərindən biri olan Əli Əkbər Vilayəti Hörmüz boğazının statusu ilə bağlı mühüm bəyanatla çıxış edib. Vilayəti "X" sosial platformasındakı rəsmi hesabında paylaşdığı mesajda strateji su yolunun gələcəyi barədə kəskin mövqe nümayiş etdirib. O bildirib ki, Hörmüz boğazı dünyaya açıq olsa da, "İran xalqının düşmənlərinə və onların regiondakı hərbi bazalarına hər zaman qapalı qalacaq". Bu açıqlama beynəlxalq enerji daşımaları üçün həyati əhəmiyyət kəsb edən su yolunda gərginliyin daha da artacağından xəbər verir.