ABŞ-nin Suriya üzrə xüsusi nümayəndəsi Tomas Barrak çərşənbə axşamı bildirib ki, İsrailin Türkiyə sərhədi yaxınlığındakı Suriya hərbi hava bazasına zərbə endirməsindən sonra rəsmi Vaşinqton İsrail, Türkiyə və Suriya arasında hərbi toqquşmanın qarşısını almaq məqsədilə xüsusi koordinasiya mexanizminin yaradılması üzərində işləyir.

Rəsmi İsrail Suriyanın şimalındakı İdlib vilayətinin şərq çölündə yerləşən "Əbu əd-Duhur" hərbi aerodromunun uçuş-enmə zolağının bombalanması ilə bağlı Suriya tərəfinin irəli sürdüyü ittihamlar qarşısında sükutunu qoruyub. Lakin bir israilli rəsmi ABŞ-nin "Fox News" telekanalına verdiyi qısa açıqlamada zərbəni etiraf edərək Təl-Əvivin hücumla bağlı məlumatı əvvəlcədən Vaşinqtonla bölüşdüyünü bildirib.