BAKI, AzerVoice

Portuqaliyalı futbol ulduzu və Əl-Nəsr klubunun kapitanı Kriştiano Ronaldo, 2025-ci ildə Səudiyyə Ərəbistanının paytaxtı Ər-Riyadda keçiriləcək Esports Dünya Kuboku (EWC) üçün qlobal səfir təyin olunub.

AzerVoice xəbər verir ki, bu barədə Esports World Cup Foundation rəsmi açıqlama yayıb.

Ronaldo bu təyinatla, iyulun 7-dən avqustun 24-dək davam edəcək və esports tarixinin ən böyük tədbiri hesab edilən bu turnirin beynəlxalq tanıtım kampaniyasına rəhbərlik edəcək. Səfir kimi o, Riyaddakı Boulevard City ərazisində təşkil olunacaq yeddi həftəlik turnirdə aparıcı tədbirlərin iştirakçısı olacaq.

Kriştiano Ronaldo həmçinin turnirin 25 əsas oyunundan biri olan FATAL FURY: City of the Wolves videooyununda oynanıla bilən personaj kimi təqdim olunacaq. 1 milyarddan çox sosial media izləyicisi olan ulduz futbolçunun, turnirə qlobal diqqəti artıracağı və yeni auditoriyaları esport dünyasına cəlb edəcəyi gözlənilir.

Ronaldo açıqlamasında bildirib ki, idman daim dəyişir və esports bu dəyişimin gələcəyə açılan qapısıdır. O vurğulayıb ki, esports oyunçularında gördüyü istedad, hədəfə bağlılıq və əzmkarlıq, onun öz futbol karyerasındakı təcrübələri ilə üst-üstə düşür:

“Bu gənc istedadların yanında olmaq və onları dəstəkləmək mənim üçün böyük ilham mənbəyidir” – deyə o qeyd edib.

Bu il keçiriləcək Esports Dünya Kuboku, 24 oyunda 25 turnir formatında olacaq və 100-dən çox ölkədən 2,000-dən çox peşəkar oyunçu və 200 klubun iştirakını təmin edəcək. Ümumi mükafat fondu 70 milyon ABŞ dollarını ötəcək.