BAKI,VOA, Orxan Qədirzadə

Misir ABŞ və İran arasında Pakistanın paytaxtı İslamabadda keçirilməsi planlaşdırılan danışıqlarda ərəb ölkələrinin iştirakının zəruriliyini bəyan edib. Qahirə vurğulayıb ki, tərəflər arasında əldə olunacaq hər hansı razılaşmada ərəb dünyasının təhlükəsizlik qayğıları mütləq nəzərə alınmalıdır.

VOA xəbər verir ki, Misirin xarici işlər naziri Abdel Ati bağdadlı həmkarı Fuad Hüseyn ilə keçirdiyi birgə mətbuat konfransında bildirib ki, Qahirə bu məsələ ilə bağlı İslamabadla sıx koordinasiya saxlayır. Nazir qeyd edib ki, Körfəz ölkələri, İordaniya və İraqın təhlükəsizlik maraqları ABŞ-İran danışıqlarının kənarında qala bilməz.

Regional diplomatik səylər və gərginliyin azaldılması

Abdel Atinin sözlərinə görə, Misir, Pakistan və Türkiyənin diplomatik səyləri, həmçinin ərəb ölkələri ilə koordinasiya nəticəsində siyasi həll yolları üçün danışıqlar masası qurulub. Nazir xəbərdarlıq edib ki, bölgənin "tam xaos"a sürüklənməsinin qarşısı alınmalıdır, əks halda davam edən münaqişələrdə hamı uduzacaq.

İraqın xarici işlər naziri Fuad Hüseyn isə ölkəsinin regional müharibədən ciddi zərər gördüyünü qeyd edib. O, Bağdadın İran tərəfi ilə İraq neftinin Hörmüz boğazından keçməsinə icazə verilməsi barədə ilkin anlaşma əldə etdiyini diqqətə çatdırıb.

Xatırladaq ki, fevralın 28-də Vaşinqton və Tel-Əvivin Tehrana qarşı başlatdığı hərbi əməliyyatlardan sonra Pakistanın vasitəçiliyi ilə iki həftəlik atəşkəs elan edilib. Lakin atəşkəs rejiminə baxmayaraq, bölgədə gərginlik yüksək olaraq qalır. Xüsusilə İsrail ordusunun Livan ərazisinə endirdiyi zərbələr nəticəsində yüzlərlə insanın həyatını itirdiyi bildirilir.