BAKI,VOA

Səudiyyə Ərəbistanı başda olmaqla bir çox ərəb ölkəsi Ramazan ayının başa çatdığını və Fitr bayramının martın 20-si, cümə günü başlayacağını rəsmi şəkildə elan ediblər. Ayın hilalının müşahidə edilməsi nəticəsində martın 19-u, cümə axşamı gününün Ramazan ayının son günü (mütəmmim) olduğu təsdiqlənib.

Səudiyyə Ərəbistanı Ali Məhkəməsi krallıq daxilində aparılan müşahidələr və şahid ifadələrinə əsaslanaraq, Şəvval ayının hilalının cümə axşamı axşam görünəcəyini, buna görə də bayramın cümə günü qeyd ediləcəyini bildirib. Səudiyyə Rəsmi Xəbər Agentliyinin (WAS) məlumatına görə, ölkədə cümə axşamı Ramazan ayının 30-cu günü kimi tamamlanacaq.

Bayramın cümə günü olduğu ölkələr

Səudiyyə Ərəbistanı ilə yanaşı, digər körfəz və ərəb ölkələri də analoji qərarlar qəbul ediblər:

Qətər: Vəqflər və İslami İşlər Nazirliyi martın 20-sini bayramın ilk günü elan edib.

Yəmən və Fələstin: Qüds və Fələstin müftisi Şeyx Məhəmməd Hüseyn martın 19-nun Ramazan ayının son günü, martın 20-sinin isə bayramın ilk günü olduğunu açıqlayıb.

Livan və İraq: İraqda Sünni Vəqfi rəsmi olaraq martın 20-si cümə gününü Ramazan bayramı elan edib.

Türkiyə və Sinqapurda fərqli yanaşmalar

Beynəlxalq Astronomiya Mərkəzinin məlumatına görə, bəzi ölkələr ayın hilalının gözlə görünməsini deyil, əvvəlcədən hazırlanmış astronomik hesablamaları əsas götürürlər:

Türkiyə və Azərbaycan : Hesablamalara və hilalın dünyanın bir çox yerində görünmə imkanına əsaslanaraq, martın 20-si cümə gününü bayram günü elan edib.

Sinqapur: Astronomik hesablamalara görə martın 19-da hilalın görünməsi mümkün olmadığı üçün Sinqapurda bayramın ilk günü martın 21-i, şənbə günü kimi müəyyən edilib.

Beləliklə, İslam dünyasının böyük bir hissəsində Ramazan bayramı cümə günü start götürəcək.