BAKI,VOA

İyulun 9-da Azərbaycan Respublikası diplomatik xidmət orqanları əməkdaşlarının peşə bayramı günü münasibətilə Gülüstan sarayında rəsmi qəbul və konsert proqramı təşkil olunub.

VOA xəbər verir ki, tədbirdə Azərbaycan Xarici İşlər Nazirliyinin və digər dövlət qurumlarının yüksək vəzifəli nümayəndələri, Milli Məclisin deputatları, eləcə də ölkədə akkreditə olunmuş diplomatik nümayəndəliklərin və beynəlxalq təşkilatların rəhbərləri iştirak ediblər.

Tədbirdə Azərbaycanın xarici işlər naziri Ceyhun Bayramov, Azərbaycan Respublikası Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev, diplomatik korpusun duayeni, Mərakeşin Azərbaycandakı səfiri Məhəmməd Adil Embarş çıxış edərək diplomatları peşə bayramı münasibətilə təbrik ediblər.

Çıxışlarda Azərbaycan diplomatik xidmət orqanlarının ölkənin xarici siyasət kursunun həyata keçirilməsində, milli maraqların beynəlxalq platformalarda müdafiəsində və dövlətin beynəlxalq nüfuzunun artırılmasında mühüm rol oynadığı vurğulanıb.

Bildirilib ki, Prezident İlham Əliyevin rəhbərliyi ilə həyata keçirilən xarici siyasət strategiyasının reallaşdırılmasında diplomatların fəaliyyəti xüsusi əhəmiyyət daşıyır.

Tədbir zamanı Azərbaycanın xarici siyasət sahəsində əldə etdiyi uğurlar, qarşıdakı prioritet istiqamətlər və diplomatik xidmət əməkdaşlarının qarşısında duran vəzifələr barədə fikirlər səsləndirilib.

Rəsmi qəbulun sonunda iştirakçılar üçün konsert proqramı təqdim olunub.