BAKI, AzerVoice

Qəzzada iki gün ərzində 200-ə yaxın insan həyatını itirib.

AzerVoice xəbər verir ki, İsrailin Qəzza zolağında son iki gün ərzində həyata keçirdiyi hərbi əməliyyatlar nəticəsində təxminən 200 nəfər həlak olub.

Hücumların əsasən Xan Yunus və Şuccaiyyə bölgələrində cəmləşdiyi bildirilir.

Avro-Aralıq dənizi İnsan Haqları Monitorunun (Euro-Med) məlumatına görə, Qəzzada yerləşən Avropa Xəstəxanası da daxil olmaqla bir sıra tibb müəssisələri hədəfə alınıb və bu, mülki şəxslərin təxliyyəsinə maneə yaradıb. Euro-Med-in bəyanatında bildirilir ki, xəstəxanaların intensiv şəkildə bombardman edilməsi mülki əhalinin sığınacaq və müalicə imkanlarını ciddi şəkildə məhdudlaşdırır.

Beynəlxalq ictimaiyyətin atəşkəs çağırışlarının artdığı bir vaxtda, ABŞ-ın da vasitəçilik cəhdlərini gücləndirdiyi müşahidə olunur. ABŞ prezidenti Donald Trampın Yaxın Şərq səfəri çərçivəsində verdiyi açıqlamalarda atəşkəsin vacibliyi vurğulanıb. Ağ Evin məlumatına görə, ABŞ-ın Yaxın Şərq üzrə xüsusi nümayəndəsi Stiv Vitkoff münaqişənin dayandırılması üçün yeni təkliflər irəli sürüb.

Eyni zamanda, ABŞ administrasiyasının dəstəyi ilə yaradılan humanitar yardım təşəbbüsü may ayının sonuna qədər Qəzzada fəaliyyətə başlamağı planlaşdırır. Yardım missiyasının əsas məqsədi bölgəyə təcili ərzaq, tibbi ləvazimat və digər humanitar dəstəyin çatdırılmasıdır.

Qeyd edək ki, bölgədə artan hərbi əməliyyatlar fonunda Qəzzadakı xəstəxanalar – xüsusilə Avropa, Əl-Avda və İndoneziya xəstəxanaları – zərər görüb. Rəsmi mənbələrə görə, yalnız Xan Yunusda baş verən hava hücumları nəticəsində 60 nəfər, əsasən qadın və uşaqlar həyatını itirib. Nasser xəstəxanasının isə yaralıların sayına görə kritik həddə çatdığı bildirilir.