BAKI, AzerVoice
İsrail ordusu Qəzza zolağındakı hərbi əməliyyatlarını genişləndirəcək.
AzerVoice xəbər verir ki, bu barədə İsrail müdafiə naziri İsrael Katsın verdiyi açıqlamada bildirilib.
Nazirin sözlərinə görə, əməliyyatın genişləndirilməsində məqsəd ərazinin terrorçulardan və onların infrastrukturundan təmizlənməsidir. Bu isə fələstinlilərin genişmiqyaslı köçürülməsini tələb edəcək.
İsrail ordusu artıq Qəzza zolağının cənubunda yerləşən Rəfah və Xan-Yunis şəhərlərinin ətrafındakı sakinlərə Al-Mavasi adlı sahil zonasında yerləşən və daha əvvəl humanitar zona elan edilmiş əraziyə köç etmələri barədə xəbərdarlıq edib.
Kats bildirib ki, təxliyə yalnız döyüşlərin getdiyi bölgələrdən həyata keçiriləcək və o, HƏMAS-ı israilli girovları geri qaytarmağa çağırıb. Onun fikrincə, bu, müharibəni dayandırmağın yeganə yoludur.
Katsın verdiyi açıqlama İsrailin hansı əraziləri nəzarətə götürəcəyi barədə konkret məlumat verilməyib.
Qeyd edək ki, İsrail ordusu artıq Qəzzada bufer zonasını genişləndirib və zolağın mərkəzindən keçən Netsarim dəhlizi boyunca geniş bir təhlükəsizlik zonası yaradıb.
Son məlumatlara görə, Qəzza zolağına gecə saatlarında endirilən zərbələr nəticəsində ən azı 15 nəfər həlak olub.
Fələstin mənbələrinin verdiyi məlumata görə, Xan-Yunis şəhərində bir evin dağıntıları altından aralarında qadınlar və uşaqların da olduğu 12 nəfərin cəsədi çıxarılıb.
Xatırladaq ki, İsrail martın 18-də Qəzzaya qarşı yeni hücumlara başlayıb. İsrail, HƏMAS-ı ABŞ-ın atəşkəsin uzadılması və hələ də Qəzzada saxlanılan 59 girovun azad edilməsi ilə bağlı yeni təklifini rədd etməkdə ittiham edib.
HƏMAS isə öz növbəsində İsraili yanvar ayında əldə edilmiş ilkin razılaşmanı pozmaqda günahlandırır.