Gürcüstanın Baş naziri İrakli Kobaxidze Orta Dəhliz kimi tanınan Trans-Xəzər Beynəlxalq Nəqliyyat Marşrutu haqqında danışaraq onun bir güvən dəhlizi rolunu oynadığını bildirib. Kobaxidze bu fikirləri Türkmənistanın paytaxtı Aşqabadda keçirilən “Beynəlxalq Sülh və Güvən İli Forumu”nun açılışında səsləndirib. Baş nazir çıxışında Tbilisi rəhbərliyinin barış siyasətinə sadiq qaldığını, regional təhlükəsizliyin möhkəmləndirilməsinə töhfə verməyə davam etdiklərini vurğulayıb. Gürcüstanın regional sülh və sabitlik üçün dialoqların aparılmasına dəstək göstərdiyini bildirən Kobaxidze “Birlikdə gələcək nəsillər üçün daha təhlükəsiz, sabit və davamlı bir gələcək qura bilərik.” - deyə qeyd edib.

ABŞ Prezidenti Donald Tramp, Tayland və Kamboca arasında atəşkəsə baxmayaraq yenidən başlayan sərhəd münaqişəsini bir neçə telefon danışığından sonra “yoluna qoyacağını” bildirib. Tramp, Respublikaçı və Demokrat Konqres üzvlərini Ağ Evdə qarşıladığı Yeni İl tədbirində gündəmdəki məsələlərə toxunub. Tayland və Kamboca arasındakı son dövrdə başlayan münaqişə xaricində, prezidentlik dönəmində dünya üzrə 8 münaqişəni sona çatdırdığını qeyd edib.

Rusiyanın növbəti hədəfi bizik. Zaman bizim xeyrimizə işləmir, indi hərəkət etməliyik. NATO Baş Katibi Rutte bu sözləri Münhen Təhlükəsizlik Konfransı çərçivəsində Berlində, Almaniya Xarici İşlər Naziri Yohann Vadefulun moderatorluğu ilə keçirilən paneldə çıxış edərkən bildirib. Rutte bildirib ki, Qərbdə Rusiya təhdidinə qarşı kifayət qədər təciliyyət hissi yoxdur. Son bir il ərzində müdafiə istehsalının artmasına baxmayaraq, NATO Baş Katibi bunun kifayət etmədiyini vurğulayıb.

Tayland və Kamboca arasındakı döyüşlər beşinci gününə daxil olub. Kamboca ordusu Taylandın hərbi qüvvələrini atəş açmaqda günahlandırarkən, Taylandın vəzifədə olan Baş Naziri Anutin Çarnvirakul ABŞ prezidenti ilə danışmaq üçün görüş planlaşdırdığını təsdiqləyib. Tayland qüvvələri cümə səhəri saatlarında Kambocanın üç əyalətində yeni hücumlar həyata keçirib. Qəzet yazır ki, Tayland qüvvələri Oddar Meançay əyalətinin Ta Moan, Ta Kra Bei və Thmar Daun bölgələrində atəş açıblar.

Yaponiyanın şimalındakı Aomori prefekturası açıqlarında 6,7 bal gücündə zəlzələ baş verib. Yaponiya Meteorologiya Agentliyinin (JMA) açıqlamasına görə, episentri Aomori prefekturasının şərq açıqları olan 6,7 bal gücündə silkələnmə qeydə alınıb. Təxminən 20 kilometr dərinlikdə meydana gələn zəlzələdən sonra ölkənin şimal və şimal-şərq bölgələri üçün sunami xəbərdarlığı edilib.

Avropa İttifaqı (Aİ), Birləşmiş Ərəb Əmirlikləri (BƏƏ) ilə Strateji Tərəfdaşlıq Müqaviləsi üzrə danışıqlara başladığını açıqlayıb. BƏƏ-də rəsmi səfərdə olan Aİ Komissiyasının Aralıq dənizi üzrə üzvü Dubravka Suica bu barədə ABŞ mərkəzli sosial media platformasında paylaşım edib. “Bugün Aİ-BƏƏ münasibətlərində mühüm bir dönüş nöqtəsini qeyd edirik. Strateji Tərəfdaşlıq Müqaviləsi üçün danışıqlara başlamaqdan və bunu BƏƏ Siyasi İşlər üzrə Nazir Müavini Lana Nuseybe ilə açıqlamaqdan böyük şərəf duyuruq.” - deyə Suica qeyd edib.

İranın səhiyyə naziri Məhəmməd Riza Zəfərkəndi bildirib ki, hava çirkliliyi hər il təxminən 50 min insanın ölümünə səbəb olur. Zəfərkəndi universitet rektorları ilə keçirdiyi görüşdə hava çirkliliyi ilə bağlı açıqlamalar verib. O, səhiyyə sahəsindəki problemlərin böyük ölçüdə iqtisadi və sosial amillərdən qaynaqlandığını vurğulayıb. “Problemlərdən biri də hava çirkliliyidir. Hər il 50 min insanın hava çirkliliyinə bağlı olaraq həyatını itirdiyinə şahid oluruq. Eyni zamanda, xəstəxanalara müraciətlər iki dəfə artıb.” - deyə Zəfərkəndi qeyd edib.

ABŞ, Böyük Britaniya və Avstraliya “nüvə ilə işləyən sualtı gəmi alyansı” kimi tanınan AUKUS ortaq təhlükəsizlik sazişi üzrə işləri sürətləndirməyə qərar verib. ABŞ-ın müdafiə naziri Pit Hegsət, Böyük Britaniyanın müdafiə naziri Con Hili və Avstraliya baş nazir müavini və müdafiə naziri Rişard Marls ABŞ-ın paytaxtı Vaşinqtonda görüşüblər və görüş barədə ortaq açıqlama verilib. Açıqlamaya görə, görüşdə AUKUS sazişinə sadiqliklərini təsdiqləyən nazirlər əməkdaşlığın uzunmüddətli uğur qazanması üçün prosesin sürətləndirilməsi və qısa müddətli hərbi hədəflərə fokuslanmaq barədə razılığa gəliblər.

İranın Rusiyadakı səfiri Kazem Cəlali təsdiqləyib ki, bu həftə İran və Rusiya prezidentləri Türkmənistanda görüş keçirəcək. Masud Pezeşkian və Vladimir Putin Beynəlxalq Sülh və Təhlükəsizlik Forumunun çərçivəsində danışıqlar aparacaqlar.

İranın Sistan-Belucistan vilayətində kimliyi məlum olmayan şəxslərin mühafizəçilərə atəş açması nəticəsində 3 nəfər həyatını itirib. Hadisə Zahedan şəhərinin Lar bölgəsində, İnqilab Keşikçiləri Ordusuna bağlı Qüds Qərargahı üzvləri xidmət zamanı baş verib. Hücumdan sonra bölgədə genişmiqyaslı əməliyyat başlayıb. Hələlik hücum edənlərin kimliyi və sayı açıqlanmayıb. İran rəsmiləri hadisədən sonra bölgədə təhlükəsizlik tədbirlərini gücləndiriblər və istintaq davam edir.

ABŞ administrasiyası çərşənbə günü Sudandakı müharibəni qızışdırmaqda ittiham etdiyi şəxslərə və təşkilatlara qarşı sanksiyalar tətbiq edib. ABŞ Maliyyə Nazirliyi bildirib ki, hədəf alınanlar paramilitar Sürətli Dəstək Qüvvələri (RSF) üçün döyüşçülər, o cümlədən uşaqlar da daxil olmaqla hərbi təlim keçən transmillət şəbəkəsinin üzvləridir. Bu baradə ABŞ Maliyyə Nazirliyinin Teror və Maliyyə Kəşfiyyatı üzrə Müavini Con Hurli açıqlama verib.

ABŞ-ın Ankara Böyükelçisi və Suriya üzrə Xüsusi Nümayəndəsi Tom Barak ABŞ Prezidenti Donald Tramp ilə Türkiyə Prezidenti Rəcəb Tayyib Ərdoğan arasındakı müsbət münasibətlərin F-35 döyüş təyyarələrinin tədarükü üzrə ən məhsuldar danışıqlara imkan yaratdığını bildirib. Barak ABŞ mərkəzli X sosial media platformasında paylaşım edərək, Türkiyə ilə F-35 proqramına yenidən qoşulma və Rusiya istehsalı olan S-400 hava hücumundan müdafiə sisteminin saxlanılması mövzusunda müzakirələrin davam etdiyini qeyd edib.