BAKI,VOA,Yusif Şərifzadə

ABŞ-ın investisiya şirkəti Apollo Global Management Avropanın aşağıbüdcəli aviaşirkətlərindən biri olan easyJet-i təxminən 7,7 milyard dollar (5,7 milyard funt sterlinq) dəyərində qiymətləndirən satınalma razılaşması əldə edib.

VOA xəbər verir ki, şirkətlərin yaydığı birgə açıqlamaya əsasən, rəqib investor Castlelake satınalma yarışından geri çəkildikdən sonra Apollo ilə razılaşma yekunlaşıb.

Müqavilə son aylarda easyJet ətrafında davam edən qeyri-müəyyənliyə son qoyur. Aviasiya sektoru bu dövrdə İran ətrafında yaranmış gərginlik fonunda artan xərclərlə üzləşib.

Məlumata görə, Castlelake bundan əvvəl easyJet üçün beş təklif irəli sürsə də, Apollo iyul ayında təqdim etdiyi daha yüksək təkliflə şirkətin direktorlar şurasının dəstəyini qazanıb.

Razılaşmaya əsasən, easyJet-in təsisçisi Stelios Haci-İoannunun ailəsi və şirkətdə qalacaq digər səhmdarlar satınalan qurumun adi səhmlərinin 45,1–49,9 faizi arasında paya sahib olacaqlar.

Avropa İttifaqının idarəetmə fondu şirkətin 5 faizə qədər, Apollo fondları isə 49,9 faizə qədər səhm paketinə nəzarət edəcək.

easyJet-in direktorlar şurası hər səhm üçün 7,15 funt sterlinq məbləğində təklifi yekdilliklə dəstəkləyib. Bu qiymət mayın 28-də, Castlelake-in marağı ictimaiyyətə açıqlanmamışdan əvvəlki bağlanış qiyməti ilə müqayisədə təxminən 81 faiz yüksəkdir.