BAKI,VOA Yusif Şərifzadə

“Save the Children” təşkilatı İsrail ilə “Hizbullah” arasında elan edilən atəşkəsə baxmayaraq Livanda uşaqların hələ də hərbi əməliyyatların qurbanına çevrildiyini açıqlayıb.

VOA xəbər verir ki, təşkilatın Livan üzrə direktoru Nora İnqdalın açıqlamasına əsasən, aprelin 17-dən etibarən 22 uşaq həyatını itirib, 89 uşaq isə yaralanıb. Məlumatların Livan Səhiyyə Nazirliyinin statistikasına əsaslandığı bildirilib.

Təşkilatın bəyanatında qeyd olunub ki, mart ayının əvvəlindən bu yana İsrail hücumları nəticəsində ölən uşaqların ümumi sayı təxminən 200-ə çatıb.

Nora İnqdal bildirib ki, “uşaqlar üçün hər gün orta hesabla dörd nəfərin öldürüldüyü və ya yaralandığı bu belə adlandırılan atəşkəs əslində uşaqlar üçün atəşkəs deyil”.

Onun sözlərinə görə, mülki əhaliyə qarşı hücumlar dayanmayıb və sadəcə fərqli formada davam edir. İnqdal əlavə edib ki, təşkilat əməkdaşlarının məlumatına əsasən, bəzi bölgələrdə hava zərbələri əvvəlki dövrlə müqayisədə daha intensiv hiss olunur.

Təşkilat beynəlxalq ictimaiyyəti Livanda daimi və pozulmaz atəşkəsin təmin olunması üçün təcili addımlar atmağa çağırıb.