BAKI,VOA, Nailə Babazadə

Dünya Bankı çərşənbə günü növbəti dörd il ərzində bir milyard insanın təhlükəsiz su ehtiyatlarına çıxışını təmin etməyi hədəfləyən yeni planını açıqlayıb.

VOA xəbər verir ki, "Water Forward" adlanan bu proqram etibarlı su xidmətlərini genişləndirməyi, həmçinin su sistemlərini quraqlıq və daşqınlara qarşı gücləndirməyi nəzərdə tutur.

Bank bildirib ki, öz vəsaitləri və texniki məsləhətləri sayəsində 2030-cu ilə qədər 400 milyon insanın su təminatı yaxşılaşdırılacaq, qalan hissə isə tərəfdaş qurumlar tərəfindən qarşılanacaq. Bu təşəbbüsdə regional inkişaf bankları, OPEC-in İnkişaf Fondu və BRICS ölkələrinin Yeni İnkişaf Bankı kimi qurumlar iştirak edəcək.

Dünya Bankının məlumatına görə, hazırda dünya əhalisinin yarısı, təxminən dörd milyard insan su qıtlığı ilə üz-üzədir. Bunun əsas səbəbləri kimi qeyri-şəffaf siyasət, zəif tənzimləmə və investisiya qoyuluşunu ləngidən qeyri-dayanıqlı kommunal xidmətlər göstərilir. Artıq 14 ölkə proqram çərçivəsində öz su sektorlarını islahat etmək öhdəliyini götürüb. Ekspertlər hesab edir ki, təkcə fiziki infrastrukturun deyil, idarəetmə məsələlərinin də diqqət mərkəzinə gətirilməsi ümidvericidir. Lakin münaqişə zonalarında, xüsusən də Yaxın Şərqdə bombardmanlar nəticəsində duzsuzlaşdırma zavodlarının zərər görməsi təhlükəsiz içməli suya çıxış problemini daha da kəskinləşdirib.