BAKI, AzerVoice, Nailə Babazadə

Ukrayna Prezidenti Volodimir Zelenski, ölkəsi ilə Rusiya arasındakı sərhəddə tampon bölgə yaradılması təkliflərini müasir müharibənin gerçəkliklərinə uyğun olmadığı üçün rədd edib.

AzerVoice xəbər verir ki, ölkə mətbuatına görə, Zelenski, bu mövzu ilə əlaqədar jurnalistlərə açıqlama verib.

Avropalı liderlərin sülh və ya atəşkəs müqaviləsi çərçivəsində Ukrayna ilə Rusiya qüvvələri arasında tampon bölgə yaradılması təkliflərini qəti şəkildə rədd edən Zelenski, bu fikrin insansız hava vasitələrinin istifadə olunduğu müasir müharibə şəraitində gerçəkliklə uyğunlaşmadığını və tətbiq oluna bilməyəcəyini vurğulayıb.

Zelenski, "Bugünkü müharibələrin texnoloji şəraitini anlamayanlar tampon bölgə təklif edir." ifadəsini işlədib.

Tampon bölgə tətbiqinin Ukrayna üçün torpaq itirilməsi ilə nəticələnə biləcəyini qeyd edən Zelenski, Rusiyanın dialoq və diplomatiyaya hazır olmadığını, müharibənin sona çatmasını təxirə salmaq üçün yollar axtardığını bildirib.

Avropa mətbuatında liderlərin atəşkəs və ya uzunmüddətli sülh razılaşması çərçivəsində iki ölkə arasında 40 kilometrlik tampon bölgə yaradılması təkliflərini müzakirə etdiklərinə dair xəbərlər yer almışdı.