BAKI, AzerVoice

BioNTech və Bristol Myers Squibb xərçəng dərmanı üzrə 11,1 milyard dollarlıq tərəfdaşlıq qurub.

AzerVoice xəbər verir ki, mRNA texnologiyası ilə tanınan Almaniyanın BioNTech şirkəti ABŞ-ın əczaçılıq nəhəngi Bristol Myers Squibb ilə birlikdə yeni xərçəng dərmanının hazırlanması üçün 11,1 milyard dollar dəyərində əməkdaşlıq müqaviləsi imzalayıb.

Müqavilə çərçivəsində tərəflər dərmanın inkişafı, klinik tədqiqatları və qlobal satışını birgə həyata keçirəcək.

BNT327 kodlu dərman şişlərin immunosupressiv təsirlərinə qarşı mübarizə aparmaq məqsədi daşıyır və müxtəlif xərçəng növlərində tək və ya kombinə edilmiş müalicə vasitəsi kimi istifadə oluna bilər. Hazırda dərmanın ağciyər xərçəngi üçün 3-cü faza klinik sınaqları davam edir, ilin sonuna qədər döş xərçəngi üçün də tədqiqatlara start veriləcəyi bildirilir.

BioNTech bu dərmanın hüquqlarını Çin biotexnologiya şirkəti Biotheus-u satın alaraq əldə edib. Müqaviləyə əsasən, Bristol Myers Squibb ilkin olaraq BioNTech-ə 3,5 milyard dollar ödəyəcək, gələcək mərhələlərdə isə əlavə 7,6 milyard dollar ödəniş mümkün olacaq. Klinik xərclər və dərmandan əldə olunacaq gəlirlər tərəflər arasında bərabər şəkildə bölüşdürüləcək.

Qeyd edək ki, BioNTech koronavirus pandemiyası dövründə hazırladığı mRNA əsaslı peyvəndlə dünya miqyasında tanınmış və bu texnologiyanı indi xərçəng müalicəsində tətbiq etməyə yönəlib.