BAKI, AzerVoice

Alimlər görmə qabiliyyətini daimi bərpa edən dərman hazırlayıb .

AzerVoice xəbər verir ki, Cənubi Koreyanın KAIST Universitetinin alimləri tor qişanın (retina) zədələnməsini müalicə edərək görmə qabiliyyətini daimi olaraq bərpa edən yeni dərman hazırlayıblar.

Bu müalicə oftalmologiya sahəsində inqilabi addım kimi qiymətləndirilir.

Araşdırma qrupu PROX1 adlı zülalın tor qişa bərpasını əngəllədiyini müəyyən edib. Normalda sinir hüceyrələrinin inkişafında rol oynayan bu zülal, zədələnmiş nahiyələrdə toplanaraq bərpa prosesini dayandırır. Alimlər balıqlarda bu zülalın olmamasını onların təbii bərpa qabiliyyəti ilə əlaqələndiriblər.

Bu tapıntılara əsasən tədqiqatçılar PROX1-i zərərsizləşdirən CLZ001 adlı xüsusi antikor hazırlayıblar. Celliaz biotexnoloji şirkəti ilə əməkdaşlıq çərçivəsində hazırlanan antikor siçanlarda retinal hüceyrələrin yenidən formalaşmasını və görmənin 6 ay müddətində qorunmasını təmin edib.

Qeyd edək ki, hazırda bu müalicənin insanlara tətbiqi üçün hazırlıq mərhələsində olan tədqiqatçılar preklinik sınaqlara başlamağa yaxındırlar. Klinik sınaqların 2028-ci ildə başlanması planlaşdırılır. Yeni müalicə göz xəstəlikləri sahəsində ümidverici gələcək vəd edir.