Bakı. AzerVoice:
Avtomobil istehsalı sertifikatı üçün "hiyləli təhlükəsizlik testi" təqdim etməkdə ittiham olunan Yapon avtomobil şirkətləri əməllərini etiraf ediblər.
AzerVoice xəbər verir ki, Toyota prezidenti Toyoda Akio avtomobilləri düzgün sertifikatlaşdırma prosesinə əməl etmədən kütləvi istehsal edib satdıqlarını etiraf edib. Toyota, Mazda, Yamaha, Honda və Suzuki-yə qarşı hökumət araşdırmaları davam edir.
Yaponiyanın Torpaq, İnfrastruktur, Nəqliyyat və Turizm Nazirliyi (MLIT) rəsmiləri yerində yoxlamalar aparmaq üçün məlum şirkətlərin istehsal müəssisələrinə göndərilib.
MLIT naziri Saito Tetsuo verdiyi açıqlamada təhlükəsizlik testindəki korrupsiyanın “son dərəcə təəssüf doğuran” bir hal olduğunu deyib.
Toyota Motor öz bəyanatında şirkətin cəmi yeddi modeldə "MLIT tərəfindən təsdiqlənməyən üsullarla sertifikatlaşdırma" aparıldığını açıqlayıb.
Toyota prezidenti Toyoda Akio mətbuat konfransında nazirliyin göstərişlərinə əməl edəcəklərini bildirərək, "Toyota olaraq üzr istəyirik. Biz avtomobilləri düzgün sertifikatlaşdırma prosesinə əməl etmədən kütləvi istehsal edib satmışıq" deyib.
