BAKI,VOA

Xorvatiyada 2008-ci ildə ləğv edilən məcburi hərbi xidmət sistemi yenidən qüvvəyə minib və yüzlərlə gənc hərbi hissələrdə xidmətə başlayıb.

VOA xəbər verir ki, Hərbi komissarlıqlara gələn çağırışçılar ilkin mərhələdə hərbi təchizatlarını qəbul edir və kazarma qaydalarına uyğun yerləşdirilirlər.

İki ay davam edəcək təlim müddətində gənclər hərbi nizam-intizam çərçivəsində hazırlıq keçəcəklər. Xorvatiya Silahlı Qüvvələrinin Baş Qərargah rəisi Tihomir Kundid bildirib ki, çağırışçılar mülki mühitdən ayrılaraq hərbi xidmətə başlayırlar, lakin bu proses ailələri narahat etməyəcək şəkildə mərhələli və stresssiz aparılacaq.

O əlavə edib ki, təlim saatlarından kənar vaxtlarda telefon istifadəsinə məhdudiyyət qoyulmayacaq.

Məcburi hərbi xidmətin ilk mərhələsində təxminən 800 nəfər silah altına alınıb. Bu qrupun yarıdan çoxunun çağırış sənədini gözləmədən könüllü şəkildə müraciət etməsi diqqət çəkib.

Çağırışçıların təxminən 10 faizini qadınlar təşkil edir. Xorvatiyada qadınlar üçün hərbi xidmət məcburi deyil.

Rəsmi məlumatlara görə, indiyədək 10 nəfər vicdani etirazçı kimi qeydiyyatdan keçib. Bu şəxslər dörd ay müddətində mülki xidmət keçəcək və hərbçilərin aldığı 1100 avroluq aylıq ödənişin yarısından azını alacaqlar.

Təlim proqramının yalnız ənənəvi hərbi bacarıqlarla məhdudlaşmayacağı bildirilib. Proqrama dron idarəetməsi, dronlara qarşı müdafiə və kiber müharibə texnologiyaları da daxil ediləcək.

Xorvatiyanın müdafiə naziri İvan Anusiç bildirib ki, məcburi hərbi xidmətin bərpasına Ukraynadakı müharibənin yaratdığı təhlükəsizlik narahatlıqları da təsir göstərib.

Onun sözlərinə görə, Rusiyanın Ukraynaya qarşı hərbi əməliyyatları və Avropada dəyişən təhlükəsizlik mühiti bu qərarın qəbulunu zəruri edib.

Xorvatiyanın bu addımından sonra Balkan regionunda da oxşar müzakirələr başlayıb. Sloveniyada müxalifət partiyaları hərbi xidmətin bərpasını gündəmə gətirir, Serbiya Prezidenti Aleksandar Vuçiç isə yaxın 12 ay ərzində məcburi hərbi xidmətin geri qaytarılacağını və hərbi xərclərin artırılacağını bildirib.

Regionda artan hərbi hazırlıq Kosova və Bosniya və Herseqovinada narahatlıq yaradıb. Analitiklər hesab edir ki, Balkan ölkələri arasında qarşılıqlı silahlanma yarışı təhlükəsi mövcuddur.

Xorvatiya hökuməti ilin sonuna qədər daha üç çağırış qrupu qəbul etməyi və ildə ümumilikdə 4 min hərbçinin hazırlanmasını planlaşdırır.

Bu qərarla Xorvatiya məcburi hərbi xidmət tətbiq edən NATO üzvü olan onuncu ölkə olub.