BAKI,AzerVoice, Fərid Mikayılov
Ukrayna Prezidenti Volodimir Zelenski, ABŞ-da keçirilən BMT Baş Assambleyasının 80-ci sessiyası çərçivəsində Suriya Prezidenti Əhməd əş-Şəraa ilə görüşdüyünü açıqlayıb.
AzerVoice xəbər verir ki, Zelenski, Telegram hesabında yayımladığı paylaşımda görüş zamanı Ukrayna və Suriyaya yönələn təhlükəsizlik təhdidlərinin, bu təhdidlərə qarşı birgə mübarizə yollarının və iki ölkə arasındakı əməkdaşlığın müzakirə edildiyini bildirib.
“Biz qarşılıqlı hörmət və etimada əsaslanan münasibətlər qurmaq barədə razılığa gəldik” — deyə Ukrayna lideri qeyd edib.
Görüş çərçivəsində iki ölkə arasında diplomatik münasibətlərin bərpa olunmasına dair ortaq bəyanat imzalanıb.
Zelenski bu addımı “önəmli bir dönüş nöqtəsi” kimi dəyərləndirərək, Ukraynanın Suriya xalqına sabitlik yolunda dəstək verməyə hazır olduğunu vurğulayıb.