BAKI,AzerVoice, Fərid Mikayılov

Polşa Silahlı Qüvvələri Rusiya ordusunun Ukraynaya hücumu zamanı Polşa hava məkanına daxil olan çoxsaylı pilotsuz uçuş aparatını (PUA) vurduğunu açıqlayıb.

AzerVoice xəbər verir ki, mməliyyat komandanlığı hadisəni “Polşa hava məkanının misilsiz pozuntusu” və “vətəndaşların təhlükəsizliyinə yönəlmiş real hücum” kimi qiymətləndirib.

Baş nazir Donald Tusk açıqlamasında, Rusiyanın Ukraynanın Polşa sərhədinə yaxın bölgələrinə hücumu zamanı Polşa hava məkanında “çoxsaylı pozuntular” qeydə alındığını və cavab əməliyyatının davam etdiyini bildirib.

Tusk, NATO Baş katibi Mark Rutte ilə daimi təmasda olduğunu vurğulayaraq, məsələnin alyans çərçivəsində diqqətlə izlənildiyini qeyd edib.

Polşa ordusu hava məkanını “dəfələrlə pozan” PUA-ların vurulduğunu təsdiqləyib. Vurulan obyektlərin axtarışı və qalıqların toplanması üzrə əməliyyatlar davam edir.

Polşadakı hadisə, Ukraynanın qərb bölgələrində – Volın və Lvovda – Rusiyanın raket və dron hücumları ilə eyni vaxtda baş verib.

Bir gün öncə isə Rusiya ordusuna məxsus idarəolunan bomba Ukraynanın şərqində pensiya almaq üçün növbədə dayanan mülki şəxsləri hədəf almış, azı 24 nəfər həlak olmuşdu.

2022-ci ildə Ukrayna raketi Polşanın cənubundakı bir kəndə düşərək iki nəfərin ölümünə səbəb olmuşdu.

2024-cü ilin iyulunda Rusiya hərbi dronu Polşanın şərqində qarğıdalı tarlasına düşərək partlamış, Polşa Müdafiə Nazirliyi bunu “provokasiya” kimi dəyərləndirmişdi.