İSTANBUL, AzerVoice, Nərmin Ağayeva

Tramp administrasiyası ABŞ-da viza sahiblərinin, xüsusilə xarici tələbələrin qalma müddətini məhdudlaşdırmaq üçün yeni qanun layihəsi təklif edib.

AzerVoice xəbər verir ki, ABŞ Daxili Təhlükəsizlik Nazirliyi (DHS) açıqlamasına görə, təklif olunan qanun layihəsi qəbul edilərsə, F-1 və J-1 viza sahibləri, yəni xarici tələbələr və mədəni mübadilə proqramı iştirakçıları maksimum 4 il, xarici mətbuat nümayəndələri (I viza) isə 240 gün ölkədə qala biləcək.

DHS-nin bəyanatında, əvvəlki administrasiyaların “qeyri-müəyyən müddətə qalmağa icazə verməsinin təhlükəsizlik riskləri yaratdığı və ABŞ vətəndaşlarını zərərə uğrattığı” iddia edilib. Yeni qaydaların sui-istifadəni aradan qaldıracağı və federal hökumətin yükünü yüngülləşdirəcəyi vurğulanıb.

X platformasında yayılan fikirlər, bu təklifin xarici tələbələrə və ABŞ-ın beynəlxalq təhsil cəlbediciliyinə mənfi təsir göstərə biləcəyini qeyd edir.

Qeyd edək ki, bu layihə 2020-ci ildə Trampın ilk prezidentlik dövründə təklif olunmuş, lakin 2021-ci ildə Bayden administrasiyası tərəfindən ləğv edilmişdi. Qanunun qəbulu halında tələbələr proqram ortasında viza yeniləməsi ilə bağlı çətinliklərlə üzləşə bilər.