BAKI, AzerVoice, Səməd Əyyubov

Serbiyanın 50-dən çox şəhər və yaşayış məntəqəsində hökumətə dəstək məqsədilə aksiyalar keçirilib.

AzerVoice xəbər verir ki, bu barədə ölkənin dövlət telekanalı RTS məlumat yayıb.

Serbiya prezident Aleksandr Vuçiç çıxışında bildirib ki, keçirilən aksiyalar hökumət əleyhdarlarına qarşı yönəlməyib. Onun sözlərinə görə, məqsəd etirazların zorakı formalarının qarşısını almaqdır.

“Biz heç vaxt insanlara qarşı olmamışıq, amma küçələrin bağlanması və zorakılığın əleyhinəyik” – deyə Vuçiç vurğulayıb.

O əlavə edib ki, küçələri bağlayan etirazçılar çox vaxt üzlərini gizlədirlər: “Onların xalq üçün təklif edəcəkləri heç nə yoxdur, buna görə də gizlənirlər və öz təhlükəsizliklərindən qorxurlar”.

Qeyd edək ki, Serbiyada etirazlar ötən ilin noyabrında Novi Sad şəhərində dəmiryolu vağzalının dam örtüyünün çökməsi nəticəsində 16 nəfərin həyatını itirməsindən sonra başlamışdı. Sonradan aksiyalara siyasi şüarlar da əlavə olunub.

Ötən həftə etirazlar daha da gərginləşib – nümayişçilər polisə qarşı toqquşub, yolları bağlayıblar və gecə saatlarında fəaliyyətlərini gücləndiriblər.