BAKI, AzerVoice, Nərmin Ağayeva

Alyaskada əsrarəngiz sunaminin sirri ortaya çıxıb.

AzerVoice xəbər verir ki, 10 avqustda Alyaskanın Endicott Arm fiyordunda qeyri-adi təbiət hadisəsi baş verib. Nə zəlzələ, nə də vulkan püskürməsi olmasına baxmayaraq, bəzi bölgələrdə suyun səviyyəsi 30 metrədək qalxıb. Təfərrüatlı araşdırmalar göstərib ki, Cənubi Sawyer buzlaqının yaxınlığında 3,5 milyard kubmetr həcmində nəhəng bir yer kütləsi yer dəyişdirərək sürüşməyə səbəb olub.

Sürüşmənin böyük hissəsi Tracy Arm fiyorduna düşərək, “seiche” adlanan yansımalı sunamiyə yol açıb. Alyaska Zəlzələ Mərkəzi bu hadisənin 2015-ci ildən bəri ən böyük sürüşmə və sunami ola biləcəyini açıqlayıb. ABŞ Sahil Mühafizəsi hadisə sonrası havadan bölgəni yoxlayıb və dağıntıların miqyasını görüntüləyib.

Alyaska Fairbanks Universitetindən Alec Bennett bildirib ki, bu cür fəlakətlər dar körfəzlər və göllər kimi coğrafi strukturlarda daha çox baş verir. Xoşbəxtlikdən, sunami insan məskənlərinə zərər verməyib, lakin gələcəkdə bu tip hadisələrin daha tez-tez baş verməsi gözlənilir.

Eyni zamanda, paytaxt Juneau şəhərində buzlaqların əriməsi və güclü yağış nəticəsində daşqınlar yaşanıb. Şəhər bələdiyyəsi ev sahiblərini və sakinləri təhlükəli sahələrdən uzaq durmağa çağırıb. Əvvəldən inşa olunan 4 km-lik müvəqqəti bəndlər və 10 min qum torbası 460-dan çox evi qoruyub.

Ekspertlər bildirirlər ki, Alyaskadakı bu təbii fəlakətlər yalnız iqlim dəyişikliyi və coğrafi risklərin nəticəsi deyil, həm də davamlı infrastruktur planlarının vacibliyini ortaya qoyur.