BAKI, Azervoice, Nərmin Ağayeva

Tramp və Putin Ukraynasız Ukraynanı müzakirə edəcək sammitə hazırlaşır.

Azervoice xəbər verir ki, ABŞ prezidenti Donald Tramp və Rusiya prezidenti Vladimir Putin gələn həftə Ukrayna müharibəsinin mümkün həll yollarını Ukrayna nümayəndələrinin iştirakı olmadan müzakirə etmək üçün görüşəcək. Görüşün əsas mövzusu “ərazi əvəzində sülh” planı olacaq.

Putinin xarici siyasət müşaviri Yuri Uşakov sammitin yerinin artıq müəyyənləşdiyini, dəqiq tarix və təfərrüatların isə hazırlıq işləri başa çatdıqdan sonra açıqlanacağını bildirib. ABŞ dövlət katibi Marko Rubio isə görüşün son dərəcə çətin olacağını, hər iki tərəfin ciddi güzəştlərə getməli olacağını vurğulayıb. Rubio həmçinin Rusiya atəşkəs elan etmədiyi halda, 8 avqustdan etibarən yeni sanksiyaların tətbiq edilə biləcəyini qeyd edib.

Ukrayna prezidenti Vladimir Zelenski sammiti “müsbət addım” kimi qiymətləndirib, lakin Ukraynasız heç bir qərarın qəbul edilməsini yolverilməz adlandırıb. O, potensial danışıqlarda Ukraynanın uzunmüddətli təhlükəsizlik təminatlarının əsas şərt olduğunu vurğulayıb.

Qeyd edək ki, Ağ Ev rəsmilərindən biri Trampın görüşün baş tutmazdan əvvəl Zelenski ilə danışıqlar aparması üçün şərt qoyulduğunu, lakin prezidentin bunu rədd etdiyini iddia edib. Putin isə Zelenski ilə görüş ideyasına qarşı olmadığını, lakin şərtlərin hələ formalaşmadığını bəyan edib.