BAKI, AzerVoice

Fransa və Avropa Komissiyası (AK) ABŞ-ın tətbiq etdiyi 30 faizlik gömrük rüsumları ilə qəti şəkildə razılaşmır. Brüsseldə cavab tədbirlərinin hazırlanması sürətləndiriləcək.

AzerVoice xəbər verir ki, bu barədə Fransa prezidenti Emmanuel Makron "X" sosial şəbəkəsində yazıb.

"Fransa Avropa Komissiyası sədri ilə birlikdə Avropa İttifaqından ABŞ-a ixracata tətbiq olunacaq 30 faizlik gömrük rüsumları ilə qəti şəkildə razılaşmır" – deyə, Makron qeyd edib.

Onun fikrincə, Avropa Komissiyasının Avropa maraqlarını qətiyyətlə müdafiə etməsi heç vaxt bu qədər vacib olmayıb.

"Bu isə, xüsusilə, əlimizdə mövcud olan hər şeyi istifadə etməklə etibarlı cavab tədbirlərinin hazırlanmasının sürətləndirilməsini nəzərdə tutur" – deyə, Fransa prezidenti əlavə edib.

O bildirib ki, əgər avqustun 1-ə qədər Avropa Komissiyası ABŞ-la razılaşmaya nail ola bilməsə, bu tədbirlər həyata keçiriləcək.

Xatırladaq ki, ABŞ prezidenti Donald Tramp daha əvvəl "Truth Social" platformasında Avropa Komissiyası sədrinə ünvanladığı məktubu dərc etmişdi. Həmin məktubda avqustun 1-dən etibarən ABŞ-ın Avropa İttifaqından idxal edilən mallara 30 faizlik gömrük rüsumu tətbiq edəcəyi bildirilirdi. Məktubda vurğulanırdı ki, yeni tariflər hal-hazırda Avropa mallarına tətbiq edilən 10 faizlik sektoral rüsumlardan ayrıca hesab olunacaq.