BAKI, AzerVoice
ABŞ-ın Texas ştatında aramsız leysan yağışlarının səbəb olduğu daşqınlar nəticəsində ölənlərin sayı 50 nəfərə çatıb.
AzerVoice xəbər verir ki, bundan əvvəl, fəlakətin episentri olan Kerr dairəsinin şerifi Larri Leyta mətbuat konfransında 43 nəfərin öldüyünü bildirmişdi.
Xilasedicilər çay sahillərini axtarışa çıxıblar — bölgədə aşırılmış ağaclar, çevrilmiş avtomobillər və lil içində qalmış qalıqlar arasında itkin düşənləri tapmaq üçün səylər davam edir. Onların dəqiq sayı hələ məlum deyil. İtkin düşənlər arasında Kerr dairəsindəki yay düşərgəsində yerləşdirilmiş 27 uşaq da var. Düşərgə su altında qaldıqdan sonra onlardan xəbər alınmayıb.
Axtarış əməliyyatlarında helikopterlər, qayıqlar və pilotsuz uçuş aparatları istifadə olunur. Məqsəd ağaclara çıxmış və ya yolun su ilə yuyulması səbəbindən təcrid olunmuş düşərgələrdə qalmış insanları tapmaqdır.
Texas ştatının qubernatoru Qreq Abbott bildirib ki, hakimiyyət gecə-gündüz çalışacaq:
“Su çəkildikcə yeni ərazilər axtarılır. Biz hər kəsi tapacağıq” – deyə, Abbott söz verib.
x x x
ABŞ-ın Texas ştatında baş verən daşqınlarda ölənlərin sayı 32 nəfərə çatıb.
AzerVoice xəbər verir ki, bu barədə Kerr dairəsinin şerifi Larri Leyta məlumat verib.
“Hazırda 32 nəfərin öldüyü məlumdur. Onlardan 18-i böyük, 14-ü isə uşaqdır” – deyə, o bildirib. Şerif axtarış-xilasetmə işləri davam etdikcə qurbanların sayının arta biləcəyi barədə xəbərdarlıq edib.
Texas ştatının qubernatoru Qreq Abbott bildirib ki, son 36 saat ərzində 850-dən çox insan təhlükəli zonalardan təxliyə olunub. O, daha əvvəl ABŞ Prezidenti Donald Trampa müraciət edərək ştatda fövqəladə vəziyyət rejiminin elan edilməsini istəyib.
Mətbuat konfransında iştirak edən ABŞ daxili təhlükəsizlik naziri Kristi Noem isə bəyan edib ki, Tramp Abbottun müraciətini təmin etməyə hazırlaşır.
Qeyd edək ki, Texasda uzun sürən leysan yağışları daşqına səbəb olub. Quadalupe çayının səviyyəsi cəmi iki saat ərzində altı metrdən çox yüksəlib.