BAKI, AzerVoice
ABŞ Prezidenti Donald Tramp, "TikTok" platformasının Çin şirkəti "ByteDance"dən alınması ilə bağlı yeni açıqlama verib.
AzerVoice xəbər verir ki, bu barədə Tramp "Fox News"a müsahibəsində danışıb.
O qeyd edib ki, “çox varlı şəxslərdən ibarət bir qrup” bu platformanı almağa hazırdır.
“Bu arada, bizim TikTok üçün bir alıcımız var. Onlar çox, çox zəngin insanlardır. Məncə, bu alqı-satqı üçün Çinin də razılığı lazım ola bilər. Sədr Si Cinpin, yəqin ki, buna razılıq verəcək” - deyə, Tramp bildirib.
O, bu investorların adlarını təxminən iki həftə ərzində açıqlaya biləcəyini əlavə edib.
Trampın bu açıqlamaları ABŞ-ın "TikTok"u qadağan etmə prosesi ilə eyni vaxta təsadüf edir. O, iyunun 19-da platformanın ABŞ-da qadağan edilməsinin sentyabrın 17-ə qədər təxirə salındığını açıqlamışdı.
Xatırladaq ki, Tramp yanvarın 20-dəki inauqurasiyasından sonra "TikTok"un bloklanması ilə bağlı imzaladığı sərəncamda bu qərarın ən azı 75 günə təxirə salındığını bəyan etmişdi. O həmçinin bildirmişdi ki, ABŞ "TikTok"un “yarısına sahib olmaq” hüququna malik olmalıdır, lakin bu fikrini necə nəzərdə tutduğunu izah etməmişdi.
TikTok məsələsi ABŞ və Çin arasında texnoloji sahədə artan gərginliyin növbəti nümunəsidir. Çin səfirliyinin mətbuat katibi Le Penuy bu vəziyyəti “qəsbə bənzər” bir hal kimi dəyərləndirmişdi.