BAKI, AzerVoice
ABŞ administrasiyası gələn həftə İranla Tehranın nüvə proqramı ilə bağlı danışıqlar aparmağı və razılaşma əldə etməyi ümid edir.
AzerVoice xəbər verir ki, bu barədə ABŞ Prezidenti Donald Tramp NATO sammitindən sonra Haaqada keçirilən mətbuat konfransında bəyan edib.
“Baxın, biz gələn həftə İranla danışıqlar aparacağıq, bəlkə də razılaşma imzalanacaq” – deyə, Tramp bildirib.
“Məni bu maraqlandırmır: nüvə proqramı üzrə razılaşmamızın olub-olmaması vecimə deyil. Biz onların nüvə proqramını məhv etdik” – deyə, o əlavə edib.
ABŞ Dövlət katibi Marko Rubio isə mətbuat konfransında qeyd edib: “Biz hər bir ölkə ilə dinc münasibətlər qurmaq istəyirik və bu, açıq şəkildə, yalnız İranın sülh danışıqlarında iştirak etməyə deyil, birbaşa ABŞ-la, üçüncü və ya dördüncü ölkə vasitəsilə deyil, birbaşa danışıqlar aparmağa hazır olmasından asılı olacaq.”
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.