BAKI, AzerVoice

ABŞ ilə İran arasında ilk birbaşa diplomatik təmasın baş verdiyi bildirilib.

AzerVoice xəbər verir ki, bu barədə "Reuters" agentliyi mənbələrə istinadən məlumat yayıb.

Məlumata əsasən, İsrailin ötən həftə İran ərazisindəki hədəfləri vurmağa başlamasından sonra ABŞ prezidenti Donald Trampın xüsusi nümayəndəsi Stiven Uitkoff və İranın xarici işlər naziri Seyid Abbas Araqçi arasında bir neçə dəfə telefon danışığı aparılıb.

Bu danışıqların məqsədi, hərbi toqquşmaların qarşısını almaq və münaqişədən diplomatik çıxış yolu tapmaq olub.

Hazırda tərəflər arasında atəşkəs və ya qarşılıqlı hücumların dayandırılması ilə bağlı konkret razılaşma olmasa da, bu təmaslar danışıqların başlanğıcı kimi qiymətləndirilir.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.