BAKI, AzerVoice

Pakistanın Pəncab əyalətində Hindistana məxsus pilotsuz təyyarənin hissələri tapılıb.

AzerVoice xəbər verir ki, Pakistanın Pəncab əyalətinin Çakval rayonunda Hindistana məxsus olduğu ehtimal edilən pilotsuz uçuş aparatının (PUA) hissələri aşkar edilib.

Tapıntı bölgədə artan gərginlik fonunda əlavə narahatlıq yaradıb.

Geo TV-nin polis mənbələrinə istinadla yaydığı məlumata görə, tapılan PUA hissələri analiz üçün müvafiq laboratoriyaya göndərilib. Samaa TV isə bildirir ki, əyalətin paytaxtı Lahorda, hava limanı yaxınlığında üç partlayış səsinin eşidilməsi vəziyyəti daha da dramatikləşdirib.

Qeyd edək ki, bu hadisə Hindistan və Pakistan arasında son günlərdə artan gərginlik kontekstində baş verir. Hindistan aprelin 22-də Pahalqam rayonunda baş verən və 26 nəfərin ölümünə səbəb olan terror aktına cavab olaraq mayın 6-da Pakistan ərazisinə və Azad Kəşmir bölgəsinə raket zərbələri endirib. Hindistan tərəfi hücum zamanı “terror strukturları” olaraq xarakterizə etdiyi 9 hədəfin vurulduğunu bəyan edib.

Buna cavab olaraq, Pakistan hakimiyyəti hücumlarda 6 mülki obyektin hədəf alındığını və nəticədə 31 nəfərin həyatını itirdiyini açıqlayıb. Pakistan ordusu həmçinin hücum zamanı Hindistana məxsus 5 döyüş təyyarəsini vurduğunu iddia etsə də, Yeni Dehli bu məlumatı təsdiqləməyib.

Hindistanın baş naziri Narendra Modi əməliyyata “Sindoor əməliyyatı” adını verib və hökumət iclasında bu hərbi addımı “qürur anı” kimi qiymətləndirib. “Sindoor” hind mədəniyyətində evli qadınların alnına çəkdiyi qırmızı tozu simvolizə edir.