Bakı, AzerVoice

İsrail üçün vacib malların daşınmasında Misir limanlarından istifadə olunduğu bildirilib.

AzerVoice xəbər verir ki, araşdırmaya görə, Misir limanları Qəzza müharibəsi zamanı İsrailə mal daşıyan yük və sement gəmiləri üçün mühüm stansiyalara çevrilib.

Misir limanları İsrail limanlarına, xüsusilə Aşdod limanına və Hayfa limanına yaxın olması səbəbindən İsrailin ixracı və idxalı üçün həyati əhəmiyyət kəsb edir. Limanların coğrafi yaxınlığı daşıma xərclərini azaldır ki, bu da dəniz yolu ilə göndərilən malların qiymətlərində özünü göstərir.

Cümə axşamı Arabi Post tərəfindən dərc edilən araşdırma, son üç ayda İsrail və Misir limanları arasında gedib-gələn 19 gəminin fəaliyyətini izləyib. Araşdırmaya görə, eyni dövrdə Misirdən başqa digər ərəb ölkələrindən heç bir gəmi İsrail limanlarına üz tutmayıb.

Gəmilər Misirin Port Səid, Ariş, Əbu Kir, İsgəndəriyyə, Diheyla və Dimyat limanlarından istifadə ediblər. Xəbərə görə, 19 gəmi arasında 7 konteyner yük gəmisi, 6 sement gəmisi, 5 ümumi yük gəmisi və taxıl, şəkər və kömür kimi qablaşdırılmamış malları daşıyan 1 yük gəmisi mövcud olub.

Misir, İsrail, Türkiyə, Yunanıstan, Sinqapur, Almaniya və Kipr şirkətlərinə məxsus gəmilər Panama, Liberiya, İsrail, Misir, Antiqua və Barbuda, Sinqapur və Saint Kitts və Nevis bayraqları altında üzüblər.

Araşdırma həmçinin müəyyən edib ki, xüsusiylə 6 gəmi əsasən Misir və İsrail limanları arasında işləyir və bunlar tikinti layihələri üçün sement daşınması üzrə ixtisaslaşıb. 6 sement daşıyan gəmi 2022 və 2023-cü illərdə Misir limanlarını tez-tez ziyarət etməyib. Lakin Qəzza müharibəsindən sonra gəmilərin səfərləri İsrail və Misir arasında cəmləşib. Məlumata görə, bu gəmilərin izlədiyi marşruta Misirin Ariş, Əbu Kir və İsgəndəriyyə limanları və İsrailin Hayfa və Aşdod limanları daxildir. Qeyd edək ki, Həm Arişdə, həm də İsgəndəriyyədə sement istehsal edən zavodlar var.

İsrailin rəsmi statistikasına görə, Qəzza müharibəsi zamanı Misir müharibədən əvvəlki dövrlə müqayisədə İsraillə ixrac və idxalını artırıb.