Bakı, AzerVoice

Çərşənbə günü Bolqarıstan parlamenti ölkənin təhsil qanunvericiliyində LGBT fəaliyyətlərini qadağan edilməsini nəzərdə tutan dəyişiklikləri təsdiq edib.

AzerVoice xəbər verir ki, Rusiyayönlü olduğu iddia edilən Vazrazhdane Partiyasının təklif etdiyi düzəliş ölkədəki bəzi Avropa İttifaqına (Aİ) tərəfdar partiyalar tərəfindən də dəstəklənib.

240 yerlik Bolqarıstan parlamentində qanun dəyişikliyi təklifi 8 əleyhinə 154 səslə qəbul edilib. 9 deputat səsvermədə bitərəf qalıb.

Qanuna edilən dəyişikliklə məktəblərdə “qeyri-ənənəvi cinsi oriyentasiya və ya qeyri-bioloji cinsi kimliklə bağlı fikir və baxışların təşviq edilməsi, yayılması və dəstəklənməsi” qadağan edilib.

Çərşənbə günü ayrıca səsvermədə bolqarıstan millət vəkilləri "qeyri-ənənəvi cinsi oriyentasiya"nı "qarşı cinsdən şəxslər arasında emosional, romantik, seksual və ya həssas cazibə ilə bağlı Bolqarıstanın hüquqi ənənəsində ümumi qəbul edilmiş və müəyyən edilmiş anlayışlardan fərqli" olaraq müəyyən edən bir qanunu da təsdiqləyiblər.

Aİ üzvü olan Bolqarıstan keçmişdə LGBTQ ilə bağlı mövqeyinə görə tənqid edilib. Bolqarıstan hökumətinə edilən çağırışlarda bu cür şəxslərin tanınması və qorunmasına zəmanət verilməsi tələb edilib.

Bolqarıstan eyni zamanda LGBTQ-ni dəstəklədiyini əsas göstərərək İstanbul Konvensiyasını ratifikasiya etməkdən imtina edib.