BAKI, AzerVoice

Avropa ölkələrində sahibsiz heyvan problemi ciddi şəkildə nəzarət altına alınıb, küçələrdə başıboş heyvanlara rast gəlmək nadir hal sayılır.

AzerVoice xəbər verir ki, Türkiyədə bu problem hələ də davam edərkən, Avropada tətbiq edilən hüquqi və maliyyə tədbirləri diqqət çəkir.

Hollandiya, Belçika, Almaniya, İspaniya, Fransa və İngiltərə kimi ölkələrdə heyvan sahiblərinə tətbiq edilən ciddi cərimə və vergilər sayəsində heyvanların küçəyə atılması halları minimuma endirilib.

Qeyd edək ki, Belçikada it sahiblərindən hər il 400 milyon avro, Hollandiyada isə bələdiyyələrə 120-160 avro arasında it vergisi ödənilir. Almaniyada isə heyvanlara dair qaydaların ciddi tətbiqi nəticəsində 10 milyondan çox ev heyvanının saxlanmasına baxmayaraq, hər il toplanan 400 milyon avro vergi sığınacaqların maliyyələşdirilməsinə yönəldilir.

İspaniyada isə qüvvədə olan Heyvanların Mühafizəsi Qanunu çərçivəsində sahibsiz heyvan problemi ilə mübarizə aparılır. Bu qanunu pozanlara 45 min avroya qədər cərimə tətbiq olunur. Fransada isə ev heyvanlarını küçəyə buraxmaq qanunsuz hesab olunur və bu qanunu pozanlar 3 ilədək həbs və 45 min avro cərimə ilə cəzalandırıla bilər.