BAKI,AzerVoice

Almaniyanın xarici işlər naziri Annalena Baerbock, Ukraynaya qarşı hücumlar davam edərkən Rusiyanın müzakirə çağırışlarının hazırda "boş sözlər və vədlərdən" başqa bir şey olmadığını bildirib.

AzerVoice xəbər verir ki, Avropalı xarici işlər nazirləri, Rusiya prezidenti Vladimir Putinin Ukraynadakı hərbi aqressiyasını dayandıracağına inanmır və ABŞ-a bu istiqamətdə cavab tədbirləri görməsi üçün təzyiqlərini artırır.

"Aydın görünür ki, Vladimir Putin atəşkəs və sülh danışıqlarına başlamaq üçün heç bir istək göstərmir" – deyə Fransanın XİN rəhbəri Jan-Noel Barro bildirib.

NATO xarici işlər nazirləri toplantısına britaniyalı həmkarı ilə birlikdə qatılan Barro, Moskvanın bu mövqeyinin Avropa-Atlantik təhlükəsizliyinə sadiq qalan hər kəsi təzyiqləri artırmağa sövq etməli olduğunu vurğulayıb.

Son həftələrdə ABŞ prezidenti Donald Tramp, Rusiya və Ukrayna arasında atəşkəs danışıqlarındakı çıxmazı aradan qaldırmağa çalışarkən, Kremlin sülhə sadiq olduğu barədə zəmanət verdiyini bildirib.

Lakin Moskva mart ayında ABŞ-ın 30 günlük atəşkəs təklifini Ukraynanın qəbul etdiyini elan etməsindən sonra rədd edib. Avropalı NATO müttəfiqləri, Putinin döyüş meydanında üstünlük qazanmaq üçün vaxt udmağa çalışdığını düşünür

"Sonsuza qədər gözləyə bilmərik. Sülh istəyirsə, bunu açıq şəkildə nümayiş etdirmək Rusiyanın üzərinə düşür. Yoxsa, müharibəni davam etdirmək niyyətində olduğunu təsdiqləmiş olacaq"- deyə İspaniyanın xarici işlər naziri Xose Manuel Albares qeyd edib.