Bakı, AzerVoice

Ukrayna prezidenti Vladimir Zelenski keçirdiyi mətbuat konfransında Türkiyənin Ukrayna üçün önəmli təhlükəsizlik təminatçısı olduğunu vurğulayıb.

AzerVoice xəbər verir ki , o , sülh üçün lazım gələrsə, prezident vəzifəsindən istefa verməyə hazır olduğunu və NATO-ya üzvlük müqabilində bu addımı ata biləcəyini bildirib.

O, ABŞ, Rusiya və Avropa ölkələrinin Ukrayna ilə birlikdə Rusiya-Ukrayna müharibəsinə dair sülh danışıqlarında iştirak etməli olduğunu vurğulayıb.

Zelenski sabah Kiyevdə sammit keçiriləcəyini, 13 tərəfdaşın şəhərə gələcəyini və 24-nün onlayn formada iştirak edəcəyini bildirib.

Zelenski ABŞ, Ukrayna və Ukrayna xalqı üçün sərfəli müqavilənin imzalanmasının vacibliyini qeyd edərək, təhlükəsizlik zəmanətlərinin yalnız ABŞ-ın vədləri ilə deyil, açıq şəkildə müqavilədə təsbit edilməli olduğunu vurğulayıb.

"Tramp əbədi qalmayacaq və bizə uzun illər sülh lazımdır", – deyə o bildirib.

Mümkün Aİ üzvlüyünün Ukrayna üçün "təhlükəsizlik zəmanəti" olacağını söyləyən Zelenski, Fransa Prezidenti Emmanuel Makronun ABŞ-a səfəri zamanı təhlükəsizlik zəmanətləri məsələsinin də müzakirə olunacağını qeyd edib.

O, ABŞ-ın yalnız maliyyə baxımından deyil, siyasət və sanksiyalar sahəsində də Ukraynaya dəstək verməsinin vacibliyini vurğulayıb: “Düşünürəm ki, ABŞ bu il müharibənin qaynar fazasını bitirmək üçün əlindən gələni edəcək. Onların məqsədi budur.” - deyə bildirib.

Bazar ertəsi Ukraynada keçiriləcək Aİ liderlərinin görüşü ilə bağlı Zelenski, təhlükəsizlik zəmanətlərinin müzakirə olunacağı bu toplantının “dönüş nöqtəsi” olacağına ümid etdiyini bildirib.

O, Türkiyəni Ukrayna üçün vacib təhlükəsizlik təminatçısı kimi gördüyünü bir daha vurğulayıb.