Bakı,AzerVoice

ABŞ Nümayəndələr Palatasının Hökumətin Səmərəliliyi Departamentinə (DOGE) dair alt komitəsinin ilk iclasında departamentin rəhbəri İlon Mask demokratların tənqid hədəfinə çevrilib.

AzerVoice xəbər verir ki, Respublikaçı konqresmen Marjorie Taylor Greene-nin sədrliyi ilə keçirilən dinləmədə demokratlar Maskı xərcləri azaltmaq məqsədilə qanunu pozmaqda ittiham ediblər.

Demokrat konqresmen Melanie Stansbury ABŞ prezidenti Donald Tramp və Maskı ehtiyatsız və qeyri-qanuni şəkildə federal hökuməti zəiflətməkdə, federal agentlikləri bağlamaqda, dövlət işçilərini ixtisar etməkdə və maliyyəni kəsməkdə günahlandırıb.

"Biz başa düşürük ki, siz sosial mediada Konqres üzvləri ilə əlaqə saxlamağa can atırsınız, lakin biz burada oyun oynamaq üçün deyilik", - deyə Stansbury bildirib və Maskı and içərək ifadə verməyə çağırıb.

Respublikaçılar isə Tramp və Maskın DOGE vasitəsilə federal israfçılığa qarşı çiyin-çiyinə mübarizə aparacaqlarını bəyan ediblər.

Qeyd edək ki, Yanvarın 20-də ABŞ prezidenti kimi and içmiş Donald Tramp tərəfindən yaradılan DOGE federal xərcləri azaltmaq və hökumətin effektivliyini artırmaq məqsədini daşıyır.

DOGE Təhsil Nazirliyinin tabeliyində olan Təhsil Elmləri İnstitutunun (TİM) büdcəsindən 900 milyon dollar ixtisar edib. Mask, həmçinin, federal agentliklərdə işçi qüvvəsi ilə bağlı xərcləri azaltmağa imkan verən bir sərəncam imzalayıb.