BAKI, AzerVoice

Hörmüz boğazı ilə bağlı yanlış ssenarilərinə etibar etməyin.

AzerVoice xəbər verir ki, Türkiyənin xəzinə və maliyyə naziri Mehmet Şimşək artan geosiyasi gərginlik fonunda Hörmüz boğazının bağlanması ilə bağlı yayılan ssenariləri təkzib edib və iqtisadi sabitliyin qorunduğunu bildirib.

“Artan geosiyasi gərginliyin iqtisadiyyatımıza təsirlərini çoxölçülü şəkildə təhlil edir və mümkün ssenariləri ətraflı şəkildə qiymətləndiririk. Bazarlarda sabitliyi qorumaq və iqtisadiyyatın sağlam işləməsini təmin etmək üçün qurumlarımız güclü koordinasiya ilə lazımi tədbirləri dərhal görməyə hazırdır.” - deyə o bildirib.

O, Hörmüz boğazı ilə bağlı ehtimalların iqtisadi narahatlığa səbəb olmamalı olduğunu vurğulayıb.

“Lütfən, Hörmüz boğazının bağlanması vəziyyətində iqtisadiyyatımızla bağlı edilən spekulyativ ssenarilərə inanmayın. Tətbiq etdiyimiz proqramla iqtisadiyyatımızın şoklara qarşı dayanıqlılığını əhəmiyyətli dərəcədə artırmışıq.” - deyə nazir qeyd edib.

“Biz inflyasiya ilə mübarizədə qərarlıyıq və onun qalıcı şəkildə aşağı salınması üçün bütün addımları atmaqda davam edəcəyik.” - deyə nazir inflyasiyaya qarşı mübarizənin də davam edəcəyini vurğulayıb.

Qeyd edək ki, İran-İsrail arasında davam edən münaqişə və bölgədə artan hərbi aktivlik Hörmüz boğazının təhlükəsizliyi ilə bağlı qlobal bazarlarda narahatlıq yaradıb. Bu isə enerji qiymətlərində dalğalanma riskini artırıb.