BAKI,AzerVoice

İranın xarici işlər naziri Abbas Ərakçi Livana səfəri çərçivəsində ölkənin daxili işlərinə qarışmadıqlarını və Livanın suverenliyinə hörmətlə yanaşdıqlarını bildirib.

AzerVoice xəbər verir ki, o, bölgədəki yeni şəraitdə Livanla münasibətlərdə yeni səhifə açmaq ümidini ifadə edib.

Ərakçi bu gün Livanın xarici işlər naziri Yusif Rəci ilə Beyrutun mərkəzində yerləşən nazirlik binasında görüşüb.

Beyrutdakı Rafiq Həriri Beynəlxalq Hava Limanında jurnalistlərə açıqlamasında səfərinin İranın qonşu ölkələrə və Qərbi Asiyaya verdiyi önəmin göstəricisi olduğunu bildirib.

"Ümid edirəm ki, Livanla qarşılıqlı hörmətə əsaslanan yeni münasibət səhifəsi açılacaq"- deyə Ərakçi bildirib.

Ərakçinin səfəri ABŞ-İran danışıqlarının yeni raundu ilə bağlı çətinliklər fonunda baş tutur. Tehran uranın dinc məqsədlərlə zənginləşdirilməsi proqramını davam etdirməkdə israrlı mövqedə qalır. İsrail isə İrana qarşı hərbi zərbələr endirə biləcəyinə dair təhdidlərini artırır.

Ərakçinin Livanda ölkənin səlahiyyətli orqanları ilə görüşərək İranın maraqlarına birbaşa və ya dolayı aid olan məsələləri müzakirə edəcəyi gözlənilir. Bu məsələlər arasında Livanda silahın yalnız dövlətin əlində olması qərarı və ölkənin ərəb ailəsinə qayıdışı ilə bağlı qərarlar da var.