BAKI, AzerVoice

ABŞ regionu tərk etməlidir.

AzerVoice xəbər verir ki, bu sözləri İranın ali rəhbəri Ayətullah Əli Xamenei, ABŞ prezidenti Donald Trampın Körfəz ölkələrinə səfəri zamanı səsləndirdiyi bəyanatlara cavab olaraq deyib.

"Trampı bölgədə sülh istədiyini deyəndə yalan danışıb. Onun bəyanatlarına cavab verməyə belə dəyməz" - deyə, Xamenei vurğulayıb.

Xatırladaq ki, Tramp cümə günü İranı ABŞ-ın nüvə razılaşması təklifi ilə bağlı tez bir zamanda addım atmağa çağırmış və əks halda "arzuolunmaz nəticələrin" baş verə biləcəyi ilə hədələyib.

Xamenei həmçinin İsraili sərt şəkildə tənqid edərək onu bölgədəki fəsad, fitnə və müharibələrin mənbəyi adlandırıb və onu "zərərli və təhlükəli xərçəng şişi" kimi xarakterizə edərək, onun yox edilməli olduğunu bildirib.

Öz növbəsində, İran prezidenti Məsud Pezeşkian da çıxış edərək Trampın bəyanatlarına reaksiya bildirib.

"Biz danışıqlar aparacağıq, amma hədələr bizi heç vaxt qorxutmayacaq" - deyə, o bildirib.

İran prezidenti, Trampın eyni anda həm sülhdən, həm də təhdiddən danışdığını bildirib.

O əlavə edib ki, İran qanuni hüquqlarından geri çəkilməyəcək və hərbi və nüvə sahəsindəki nailiyyətlərindən imtina etməyəcək.