BAKI, AzerVoice

İqtisadiyyatı sabitləşdirmək və inflyasiyanı tək rəqəmli səviyyəyə endirmək üçün həyata keçirdiyimiz islahat proqramı planlandığı kimi davam edir.

AzerVoice xəbər verir ki, Türkiyənin xəzinə və maliyyə naziri Mehmet Şimşək ABŞ-da keçirilən G20, BVF və Dünya Bankı toplantılarında çıxış edərək, ölkə iqtisadiyyatını sabitləşdirmək, inflyasiyanı nəzarətə almaq və struktur islahatları reallaşdırmaq məqsədilə tətbiq olunan makroiqtisadi sabitlik proqramının uğurla davam etdiyini bildirib.

“Proqramımız yolundadır” deyən Şimşək, inflyasiyanı tək rəqəmli səviyyələrə salmağı və fiskal intizamı qorumağı hədəflədiklərini vurğulayıb. O, son qlobal iqtisadi qeyri-müəyyənliklər fonunda tədbirli və məsuliyyətli iqtisadi siyasətlərə sadiq olduqlarını bildirib.

Qeyd edək ki, Şimşək inflyasiyanın enerji qiymətlərindəki eniş və maliyyə şərtlərinin sərtləşməsi nəticəsində nəzarət altında qalacağını desə də, qlobal ticarət böhranlarının böyümə və ixracat üçün risk yaratdığını etiraf edib. Bununla yanaşı, ölkədaxili sərt maliyyə şərtləri və idxalın azalması cari hesab balansında müsbət dinamika yarada bilər.

Nazir həmçinin, struktur islahatlara sürət verəcəklərini, bu çərçivədə yaşıl enerji keçidi, rəqəmsal infrastruktur və süni intellekt sahəsində irəliləyişlərin prioritet olacağını qeyd edib.

Şimşək Türkiyənin istehsal gücü və coğrafi mövqeyi sayəsində Qərb bazarlarına inteqrasiyada üstünlük qazandığını, bəzi Asiya sifarişlərinin Türkiyəyə yönələ biləcəyini və bunun xarici sərmayələr üçün yeni imkanlar yaradacağını da bildirib.

Bununla yanaşı, Dünya Bankı ilə əlaqələrin gücləndiyini, təşkilatın Türkiyəyə ayırdığı öhdəliyin 17 milyard dollardan 35 milyard dollara yüksəldiyini qeyd edən nazir, texniki dəstək və bilik mübadiləsinin də önəmli rol oynadığını vurğulayıb.

Avropa İttifaqının müdafiə xərclərinə dair planlarını da dəyərləndirən Şimşək, Türkiyənin bu ehtiyacları qarşılayacaq nadir ölkələrdən biri olduğunu və bu sahədə əməkdaşlığın genişlənə biləcəyini bildirib.