BAKI,VOA,Yusif Şərifzadə

Yəməndə fəaliyyət göstərən husi hərəkatı Mərib şəhəri yaxınlığında Səudiyyə Ərəbistanının dəstəklədiyi qüvvələrə və hərbi obyektlərə zərbələr endirdiyini iddia edib.

VOA xəbər verir ki, husilərin hərbi sözçüsü Yəhya Səri "Telegram" kanalında yaydığı bəyanatda hücumlar zamanı Səudiyyə Ərəbistanının dəstəklədiyi qüvvələrin mövqelərinin, silah-sursat anbarlarının və hərbi texnikasının hədəfə alındığını bildirib.

Sərinin sözlərinə görə, husilər ölkəyə qarşı tətbiq olunduğunu iddia etdikləri mühasirənin davam etdirilməsi məqsədilə Səudiyyə Ərəbistanının səfərbər etdiyi qüvvələrə qarşı əməliyyatlarını davam etdirəcəklər.

O əlavə edib ki, hərəkat "Səudiyyə düşməninin səfərbər etdiyi istənilən qüvvəyə və hərbi birləşməyə qətiyyətlə zərbələr endirməyə davam edəcək".

Bundan əvvəl Yəmənin beynəlxalq səviyyədə tanınan hökumətinin səhiyyə naziri Qasım Buhaibeh husilərin Məribə hücumları nəticəsində azı iki mülki şəxsin həlak olduğunu, 14 nəfərin isə yaralandığını açıqlamışdı.

Husilər isə öz bəyanatlarında mülki itkilərlə bağlı hər hansı açıqlama verməyiblər.