BAKI,VOA
Suriya prezidenti Əhməd əş-Şəraa Ali Konstitusiya Məhkəməsinin sədri və üzvlərinin təyin edilməsi haqqında fərman imzalayıb.
Fərmana əsasən, İsam Xalid əl-Xəlif Ali Konstitusiya Məhkəməsinin sədri təyin olunub.
Məhkəmənin üzvləri vəzifəsinə isə Xeyrullah Nədim Qannum, Məhəmməd Mustafa Səbia, İman Antuan Nuri, İsmayıl Həmadi əl-Xalfan, Rəyyan Həsən Kəhilan və Arif Əhməd əş-Şaal təyin ediliblər.
Fərmanda bildirilib ki, Ali Konstitusiya Məhkəməsi onun fəaliyyətini və səlahiyyətlərini tənzimləyəcək yeni qanun qəbul edilənədək əsas konstitusiya funksiyalarını yerinə yetirəcək.
Məhkəmənin səlahiyyətlərinə qanunların və normativ aktların Konstitusiyaya uyğunluğuna nəzarət, prezidentin müraciəti əsasında qanun layihələrinin konstitusiyaya uyğunluğu barədə rəy verilməsi, həmçinin prezidentin və ya Xalq Məclisinin sədrinin müraciəti ilə qanunvericilik təşəbbüslərinin konstitusiyaya uyğunluğunun qiymətləndirilməsi daxildir.
Bundan başqa, məhkəmə prezidentin və ya Xalq Məclisinin sədrinin müraciəti əsasında Konstitusiya Bəyannaməsinin müddəalarını şərh etmək səlahiyyətinə malik olacaq.
Xatırladaq ki, 2025-ci il martın 13-də Əhməd əş-Şəra Suriyada keçid dövrünü beş il müəyyən edən Konstitusiya Bəyannaməsini imzalayıb. Həmin sənədin 47-ci maddəsinə əsasən, yeddi nəfərdən ibarət Ali Konstitusiya Məhkəməsi yaradılır və onun üzvləri dürüstlüyü, peşəkarlığı və təcrübəsi ilə seçilən şəxslər arasından prezident tərəfindən təyin edilir.
2024-cü il dekabrın 8-də Suriya müxalif qüvvələri Dəməşqə daxil olaraq, 2000–2024-cü illərdə ölkəyə rəhbərlik etmiş Bəşər Əsəd hakimiyyətinə son qoyduqlarını elan etmişdilər. Bəşşar Əsəd hakimiyyəti 2000-ci ildə 1971–2000-cü illərdə ölkəni idarə etmiş atası Hafiz Əsəddən miras almışdı.