BAKI,VOA,Yusif Şərifzadə
HƏMAS-ın Qəzzada idarəetmə komitəsini ləğv etməsi bölgədə alternativ mülki idarəçiliyə yol açan addım kimi qiymətləndirilir.
VOA xəbər verir ki, HƏMAS uzun illər nəzarət etdiyi bəzi mülki idarəetmə sahələrindən geri çəkildiyini açıq şəkildə bəyan edib. Bu qərarın əsas məqsədi Qəzzanın İdarə Olunması üzrə Milli Komitənin bölgəyə daxil olması və səlahiyyətləri üzərinə götürməsi üçün şərait yaratmaqdır.
Məlumata görə, yeni komitənin qarşısında əsas vəzifələrdən biri İsrailin hərbi əməliyyatları başladıqdan sonra genişlənən idarəetmə boşluğunu azaltmaq olacaq. Qəzza sakinləri bu addımın təkbaşına kifayət etmədiyini bildirsələr də, bunu Fələstinin daha vahid şəkildə irəliləməsi üçün ilkin mərhələ kimi qiymətləndirirlər.
Təhlilçilər hesab edirlər ki, HƏMAS bu addımla çeviklik və məsuliyyət nümayiş etdirməyə çalışır. Onların fikrincə, hərəkat yeni komitənin fəaliyyətə başlaması üçün lazımi siyasi və inzibati şəraitin formalaşmasına vaxt və imkan yaratmaq istəyir.