BAKI,VOA Orxan Qədirzadə

Səudiyyə Ərəbistanının Birləşmiş Millətlər Təşkilatı yanında daimi nümayəndəsi Əbdüləziz Əlvasil terror qruplaşmalarının süni intellekt və yeni texnologiyalardan istifadəsinin qarşısının alınması məqsədilə beynəlxalq əməkdaşlığın gücləndirilməsinə, təcrübə mübadiləsinin genişləndirilməsinə və potensialın inkişafına daha çox sərmayə qoyulmasına çağırıb.

Əbdüləziz Əlvasil bu fikirləri Birləşmiş Millətlər Təşkilatı Baş Assambleyasının süni intellekt və yeni yaranan texnologiyalardan sui-istifadəyə qarşı mübarizədə strateji potensialın gücləndirilməsinə həsr olunmuş və onun həmsədrlik etdiyi iclasda səsləndirib.

O bildirib ki, Yəməndə potensialın gücləndirilməsi xüsusi əhəmiyyət daşıyır. Onun sözlərinə görə, terrorçu husi qruplaşması və "Əl-Qaidə" kimi terror təşkilatlarının pilotsuz uçuş aparatları və digər müasir texnologiyalar daxil olmaqla yeni imkanlardan istifadə etməyə çalışması bölgədə təhlükənin artmasına səbəb olur.

Əlvasil qeyd edib ki, dünya yeni və inkişaf etməkdə olan texnologiyalar sahəsində sürətli dəyişikliklərlə üz-üzədir. Eyni zamanda terror qrupları da bu texnologiyalardan üzv cəlb etmək, ekstremist təbliğat aparmaq, maliyyə vəsaiti toplamaq və terror aktlarını planlaşdırmaq üçün getdikcə daha bacarıqlı şəkildə istifadə edirlər.

Onun sözlərinə görə, dövlətlər bu dəyişən təhdidlərə uyğun şəkildə hazırlıq səviyyəsini yüksəltməli və milli imkanlarını daha da gücləndirməlidirlər.

Səudiyyə Ərəbistanının nümayəndəsi bildirib ki, ölkəsi terrorizm və ekstremizmlə mübarizədə potensialın gücləndirilməsini əsas dayaqlardan biri hesab edir. O vurğulayıb ki, terrorizmlə mübarizədə uğur yalnız təhlükəsizlik tədbirlərindən asılı deyil. Güclü dövlət institutlarının formalaşdırılması, səmərəli hüquqi mexanizmlərin yaradılması, beynəlxalq əməkdaşlığın genişləndirilməsi, insan resurslarının və texniki imkanların davamlı inkişafına investisiya qoyulması da bu sahədə həlledici rol oynayır.

Əlvasil çıxışında Səudiyyə Ərəbistanının milli, regional və beynəlxalq səviyyələrdə potensialın gücləndirilməsi istiqamətində həyata keçirdiyi təşəbbüslərdən də bəhs edib.

O xatırladıb ki, Səudiyyə Ərəbistanı 2011-ci ildə Birləşmiş Millətlər Təşkilatının Terrorla Mübarizə Mərkəzinin yaradılmasına dəstək verib və təşkilata üzv dövlətlərin BMT-nin Qlobal Terrorla Mübarizə Strategiyasını həyata keçirmək imkanlarını artırmaq məqsədilə ümumilikdə 110 milyon ABŞ dolları məbləğində maliyyə vəsaiti ayırıb.

Əlvasil bildirib ki, ölkəsi Qlobal Terrorla Mübarizə Forumu, İŞİD terror təşkilatına qarşı yaradılmış Qlobal Koalisiya və s. kimi koalisiyalarda fəal iştirak etməklə beynəlxalq səylərə dəstəyini davam etdirir. O qeyd edib ki, Səudiyyə Ərəbistanı terrorizmlə mübarizəni yalnız effektiv tərəfdaşlıq, davamlı təcrübə və bilik mübadiləsi əsasında mümkün olan ümumi məsuliyyət kimi qiymətləndirir.

Diplomat əlavə edib ki, Səudiyyə Ərəbistanı Ekstremist İdeologiya ilə Mübarizə üzrə Qlobal Mərkəzi yaradıb. Mərkəz ekstremist məzmunun monitorinqi, təhlili və qarşısının alınması ilə məşğul olur, eyni zamanda rəqəmsal məkanda terrorçu təbliğatına qarşı mübarizə aparmaq və ictimai maarifləndirməni gücləndirmək üçün müasir texnologiyalardan istifadə edir.

Əlvasil vurğulayıb ki, potensialın gücləndirilməsi proqramları yardım alan dövlətlərin ehtiyacları və milli prioritetləri əsasında hazırlanmalıdır. Onun sözlərinə görə, bu proqramlar yalnız həmin dövlətlərin müraciəti və tam razılığı əsasında həyata keçirilməli, bütün fəaliyyətlər onlarla sıx əlaqələndirilməlidir. Bu yanaşma layihələrin uzunmüddətli davamlılığını və səmərəliliyini təmin edir.

Diplomat bildirib ki, Səudiyyə Ərəbistanı Yəmənin beynəlxalq səviyyədə tanınmış hökumətinə dəstək məqsədilə yaradılmış koalisiya çərçivəsində və həmin hökumətlə koordinasiya şəraitində Yəmənin təhlükəsizlik qurumlarının terrorizmlə mübarizə potensialının gücləndirilməsinə yardım göstərir.

Onun sözlərinə görə, bu dəstək xüsusilə ölkənin cənubundakı azad edilmiş bölgələrdə terrorçuların maliyyə və maddi-texniki təminat şəbəkələrinin aşkar olunmasına və fəaliyyətinin pozulmasına, həmçinin terror qruplaşmalarına texnologiya və hərbi imkanların ötürülməsi cəhdlərinin qarşısının alınmasına yönəlib.

Əlvasil qeyd edib ki, həyata keçirilən tədbirlər nəticəsində Yəməndə təhlükəsizlik və sabitliyin möhkəmləndirilməsi istiqamətində mühüm nəticələr əldə olunub, terror qruplaşmalarının təhlükəsizlik boşluqlarından istifadə edərək fəaliyyət dairəsini genişləndirmək cəhdlərinin qarşısı alınıb.