BAKI,VOA,Yusif Şərifzadə

Livan ordusunun hərbçilərinin həlak olması rəsmi Beyrutun sərt reaksiyasına yol açıb.

VOA xəbər verir ki, Livanın cənubunda baş verən hadisələr zamanı hərbçilərdən biri motosikletlə hərəkətdə olarkən hədəfə alınıb və həyatını itirib.

Məlumata görə, bu hadisədən sonra adətən siyasi məsələlərə münasibət bildirməkdən çəkinən Livan ordusu kəskin bəyanatla çıxış edib.

Qeyd olunur ki, Livan dövləti uzun müddətdir İsraillə danışıqları ayrıca xətt üzrə aparır və rəsmi Beyrut həm İranın, həm də Hizbullahın Livan adından danışıq aparmasının doğru olmadığını bildirir.

Bu çərçivədə Livan və İsrail nümayəndələri Vaşinqtonda görüşlər keçirirlər. Müzakirələrdə atəşkəsin möhkəmləndirilməsi və İsrail qüvvələrinin geri çəkilməsi prosesində Livan ordusunun nəzarəti öz üzərinə götürəcəyi pilot bölgələrin yaradılması məsələləri də yer alır.

Lakin Livan ordusunun hərbçilərinin həlak olması ölkədə ciddi narazılıq yaradıb.

Livan ordusunun açıqlamasında bildirilib ki, İsrailin hərəkətləri ölkədə sabitliyin təmin olunmasına yönəlmiş təşəbbüslərə maneə yaradır.

Bu arada İsrail və Hizbullah bir-birini atəşkəsi pozmaqda ittiham etməyə davam edir.

Bölgədə isə qarşıdurmaların əsas nəticəsi mülki əhali arasında itkilərin artması və yaşayış məntəqələrinin zərər görməsi olaraq qalır.