BAKI,VOA,Yusif Şərifzadə
Livanın “Hizbullah” hərəkatının baş katibi Naim Qassem İranı “qürur və şərəf simvolu” adlandırıb və Tehrana təşəkkür məktubu göndərib.
VOA xəbər verir ki, Qassem bu fikirləri İran parlamentinin sədri Məhəmməd Baqir Qalibafa ünvanladığı məktubda ifadə edib.
Hizbullah rəhbəri bildirib ki, İranın apardığı danışıqlar nəticəsində İsrailin bütün cəbhələrdə, o cümlədən Livanda hərbi əməliyyatları dayandırmağa məcbur qalması razılaşmanın əsas bəndlərindən biri kimi qiymətləndirilir.
Onun sözlərinə görə, İran illərdir Hizbullah və Livan xalqına dəstək göstərib və bu dəstək müqabilində heç bir tələb irəli sürməyib.
Qassem qeyd edib ki, İran bölgədə “müqavimət qüvvələrinə” güc, seçim imkanı və siyasi dayaqlar verib.
O əlavə edib ki, İran İsrailə qarşı mövqeyinə görə ciddi təzyiqlərlə və risklərlə üzləşsə də, öz mövqeyindən geri çəkilməyib.
Hizbullah baş katibi İranın bölgədəki rolunu yüksək qiymətləndirərək onu “şərəf və qürur simvolu” kimi xarakterizə edib.