BAKI,VOA Yusif Şərifzadə
BMT Baş katibinin müavini və sözçüsü Farhan Haq bildirib ki, İsrail Müdafiə Qüvvələri Livanın cənubunda fəaliyyət göstərən BMT sülhməramlı qüvvələrinin (UNIFIL) hərəkətinə iki dəfə mane olub.
VOA xəbər verir ki, Haqın sözlərinə görə, Biyyada şəhərinin cənubunda İsrail tankı Livan Qızıl Xaçının müşayiəti ilə hərəkət edən sülhməramlı karvanı dayandıraraq top lüləsini onların istiqamətinə yönəldib və ərazini tərk etmələrini tələb edib. Karvan daha sonra hərəkətini davam etdirə bilib.
İkinci hadisədə isə Naqura yaxınlığında İsrail tankı UNIFIL patrulunu qısa müddətlik bloklayıb. BMT sözçüsü qeyd edib ki, bu cür məhdudiyyətlər UNIFIL-in sərbəst hərəkət hüququna ziddir və bütün tərəflər bu hüquqa tam əməl etməlidir.
Həmçinin bildirilib ki, Rmeyş bölgəsi yaxınlığında İsrail ordusunun atdığı üç mərmi UNIFIL mövqelərindən təxminən 70 metr məsafəyə düşüb. Bundan əlavə, Biyyada ərazisində BMT mövqelərinə yaxın zərbələr nəticəsində binalara maddi ziyan dəyib.