BAKI,VOA Orxan Qədirzadə

Qəzza zolağında İsrail ordusunun həyata keçirdiyi hücumlar nəticəsində son 48 saat ərzində 5 fələstinli həlak olub, 15 nəfər isə yaralanıb.

VOA xəbər verir ki, bu barədə Qəzza Səhiyyə Nazirliyi məlumat yayıb. Nazirliyin açıqlamasına əsasən, xəstəxanalara 4 nəfərin cəsədi gətirilib, dağıntılar altından isə daha bir nəfərin meyiti çıxarılıb.

Rəsmi məlumata görə, 2025-ci ilin oktyabr ayında qüvvəyə minmiş atəşkəs razılaşmasından bəri ümumi ölənlərin sayı 850 nəfərə, yaralıların sayı isə 2433 nəfərə çatıb. Bundan əlavə, dağıntılar altından və küçələrdən 770 meyitin çıxarıldığı bildirilib.

Qəzza Səhiyyə Nazirliyi qeyd edib ki, 2023-cü ilin oktyabrından bəri davam edən müharibə nəticəsində ümumi ölənlərin sayı 72 min 736 nəfərə yüksəlib.

Bu arada, Qəzza Mülki Müdafiə Xidməti İsrail aviasiyasının ötən gecə Qəzza şəhərinin Şati qaçqın düşərgəsində yerləşən Ədəm ailəsinə məxsus evi bombaladığını açıqlayıb. Hücum nəticəsində 9 nəfərin yaralandığı, tamamilə dağılan evdə və ətraf binalarda yanğınların baş verdiyi bildirilib.

Mülki müdafiə xidmətinin məlumatına görə, zərbə yaxınlıqdakı onlarla yaşayış binasına da ciddi ziyan vurub. Rəsmilər dağıntılar səbəbindən çox sayda ailənin evsiz qalmaq təhlükəsi ilə üzləşdiyini bildirirlər.

Hadisə şahidlərinin sözlərinə görə, İsrail ordusu hücumdan əvvəl yaşayış məhəlləsinin boşaldılması barədə xəbərdarlıq edib. Daha sonra əraziyə əvvəlcə partlamayan raket atılıb, ardınca isə döyüş təyyarəsi tərəfindən ikinci zərbə endirilib.

Qeyd edək ki, İsrail və HƏMAS arasında əldə olunmuş atəşkəs razılaşması 2025-ci ilin 10 oktyabr tarixində qüvvəyə minib. Buna baxmayaraq, tərəflər bir-birini razılaşmanı pozmaqda ittiham edir.

BMT-nin hesablamalarına görə, müharibə nəticəsində Qəzza zolağındakı mülki infrastrukturun təxminən 90 faizi dağılıb və bölgənin yenidən qurulması üçün təxminən 70 milyard dollar vəsait tələb olunur.