BAKI,VOA

Səudiyyə Ərəbistanı Krallığı öz hava məkanının hər hansı hücum xarakterli hərbi əməliyyatlara dəstək məqsədilə istifadəsinə icazə verməyib. Bu haqda VOA ərəb KİV-lərinə istinadən xəbər verir.

Məlumatda qeyd olunur ki, Ər-Riyad gərginliyi azaltmağa çalışır və müharibəni bitirəcək razılığa nail olmaq üçün Pakistanın göstərdiyi səyləri dəstəkləyir.

Bununla yanaşı, Səudiyyə Ərəbistanı Xarici İşlər Nazirliyinin ümumi məsələlər üzrə müavini doktor Raid Qırməli Krallığın gərginliyi azaltmaq, eskalasiyadan qaçmaq, eləcə də bir tərəfdən İran, digər tərəfdən isə ABŞ və İsrail arasındakı müharibəni dayandırmaq üçün danışıqlar yoluna və səylərə dəstək vermək mövqeyinin davam etdiyini təsdiqləyib.

Xarici İşlər Nazirliyinin rəsmisi Ər-Riyadın eskalasiyadan qaçmaq və sabitliyi dəstəkləmək istiqamətindəki dəyişməz mövqeyini vurğulaylb.

Öz növbəsində, Körfəz Araşdırmaları Mərkəzinin rəhbəri doktor Əbdüləziz bin Saqr hesab edir ki, Səudiyyənin mövqeyi başlanğıcdan aydın olub və "eskalasiyaya yol verməmək, hər hansı ixtilafları siyasi dialoq vasitəsilə həll etmək" üzərində cəmləşib.